Kopenhagen yaqinidagi port uzra noma’lum dronlar uchib o‘tdi. Daniya politsiyasi tergov boshladi

Daniya politsiyasi xodimlari Kopenhagendan 45 kilometr janubi-g‘arbda joylashgan Kyoge shahri porti uzra paydo bo‘lgan uchuvchisiz uchish apparatlariga oid ma’lumotlarni tergov qilishni boshladi. Bu haqda idora ma’lumotlariga tayanib, Associated Press xabar berdi.

Dronlar paydo bo‘lgani to‘g‘risida politsiyaga guvohlardan biri xabar bergan. U 3 yanvar kuni portda katta tezlikda ko‘rfaz tomon uchib ketgan 20 ga yaqin dronni ko‘rgan.

Politsiyachilar voqea joyiga yetib kelganida, ular Kyoge pristanida faqat to‘rtta katta dronni aniqlagan xolos. Endi politsiya uchuvchisiz uchish apparatlarining umumiy soni va ular kimga tegishli ekanini aniqlash bilan shug‘ullanmoqda. Qayd etilishicha, dronlar paydo bo‘lgan vaqtda ushbu hududda parvoz uchun ruxsat berilmagan.

Associated Press’ning yozishicha, huquq-tartibot organlari «Rossiyaning Yevropa davlatlariga gibrid hujumlari xavfi sabab» dronlarning aniqlanishi bilan bog‘liq boshqa holatlarni ham tergov qilmoqda.

Noma’lum uchuvchisiz uchish apparatlarining parvozlari bir necha oydan beri dunyoning ko‘plab davlatlarida kuzatilmoqda. 2024 yil oxirida bir nechta dron Germaniyadagi muhim sanoat obektlari va AQShdagi aviabaza uzra paydo bo‘lgandi.

FQB dekabr oyida bir oy ichida dronlarga oid 5 mingga yaqin xabar kelib tushgani, ammo ularning qariyb 100 tasiga hukumat e’tibor qaratishga arzishi to‘g‘rida xabar bergan edi.

Avvalroq AQShning amaldagi prezidenti Jo Bayden administratsiyasi mamlakatda Xitoy uchuvchisiz uchish apparatlarini cheklash yoki taqiqlash imkoniyatini ko‘rib chiqayotgani to‘g‘risida xabar berilgandi.