Germaniyaning Xristian-demokratik ittifoqi (XDI)dan hukumat rahbari lavozimiga nomzod Fridrix Mers «hozirgi kansler Olaf Shols qilayotgan ishning aksini qilsa, buyuk kansler bo‘lishi imkoniyati bor». Bu fikrni Mediengruppe Funke media-guruhining Meine schwerste Enscheidung («Mening eng qiyin qarorim») podkastida Yevroparlamentning xavfsizlik va mudofaa bo‘yicha quyi qo‘mitasi rahbari, Erkin demokratik partiya (ErDP)dan Mari-Agnes Shtrak-Tsimmerman bildirdi.
Xususan, uning so‘zlariga ko‘ra, Mers Ukrainani keyingi qo‘llab-quvvatlash masalalarida Sholsdan ko‘ra jasoratli bo‘lishi kerak. Agar u ikkilanib, «yumshoqlik» ko‘rsatsa, «ko‘plab kanslerlardan biriga aylanadi», - deydi Shtrak-Tsimmermann. Biroq, Ukrainani qo‘llab-quvvatlash, uning fikricha, «vaziyatni haqiqatan ham o‘zgartirish» imkoniyatiga ega.
«Shols o‘tmishga aylandi»
Mari-Agnes Shtrak-Tsimmerman Olaf Sholsning hukumat rahbari lavozimida qolish imkoniyati yo‘qligiga ishonchi komil. «Olaf Shols o‘tmishga aylandi», dedi u va hozirgi Germaniya hukumatining Ukrainaga nisbatan olib borayotgan siyosati tufayli «muxolifatga o‘tishini» eng qiyin siyosiy qarori sifatida tilga oldi. «Biz bir jamoamiz va men jamoaviy o‘yinchiman», dedi Shtrak-Tsimmerman. Biroq, u ta’kidlaganidek, «kanslerga Ukrainani qo‘llab-quvvatlashga kelganda, sodiqlik bo‘yicha ham chegara borligini aytish»ga majbur bo‘ldi.
2024 yilgacha Bundestagning mudofaa qo‘mitasi raisi bo‘lib ishlagan Shtrak-Tsimmerman ErDP hukmron koalitsiyaning bir qismi bo‘lsa-da, Sholsning Ukrainaga nisbatan siyosatini bir necha bor ochiq tanqid qilgan. Shunday qilib, u Sholsning Kiyevga nemis qurollarini, birinchi navbatda, TAURUS uzoq masofali raketalarini yetkazib berish bo‘yicha pozitsiyasini juda ehtiyotkor deb hisobladi.
Mers Yevropada Ukraina bo‘yicha aloqa guruhini tuzishga chaqirdi
Xristian-demokratik ittifoq (XDI) va Xristian-sotsial ittifoq (XSI) muxolifat blokidan Germaniya kansleri lavozimiga nomzod Fridrix Mers AQShda bo‘lajak hokimiyat almashishi munosabati bilan Ukrainaga keyingi yordamni muvofiqlashtirish uchun Yevropa aloqa guruhini shakllantirishni taklif qildi. «Biz Ukraina hech qanday cheklovlarsiz o‘zini himoya qilish huquqidan foydalanishi uchun hamma narsani qilishimiz kerak», dedi u 9 dekabr kuni Kiyevda Ukraina prezidenti Volodimir Zelenskiy bilan uchrashuvda.
Bundan tashqari, yevropaliklar Ukrainadagi urush imkon qadar tezroq tugashi uchun hamma narsani qilishi kerak, deb ta’kidladi Bundestagdagi XDI/XSI fraksiyasi rahbari. Uning so‘zlariga ko‘ra, AQShda Donald Trampning hokimiyat tepasiga kelishiga tayyorgarlik ko‘rish va barcha ehtimoliy ssenariylarni o‘ylab ko‘rish kerak.
Mers fikricha, Yevropaga Germaniya, Fransiya yoki Britaniyaning bir o‘zi ishlab chiqa olmaydigan strategiya kerak. «Biz bu strategiyani faqat birgalikda ishlab chiqishimiz mumkin», deya qo‘shimcha qildi u. Mers, shuningdek, Zelenskiyning Daniya bunday aloqa guruhida muhim rol o‘ynashi mumkinligi haqidagi taklifini «katta qiziqish bilan» qabul qilganini aytdi.
