Ukraina Qurolli kuchlari 2 yanvar, payshanba kuni Rossiyaning Kursk oblasti Marino qishlog‘ida Rossiya harbiylari qo‘mondonlik punktiga zarba berdi. «Ushbu hujumlar, birinchi navbatda, Rossiya Federatsiyasining Ukrainaning tinch aholisiga qarshi harakatlarni amalga oshirish qobiliyati va istagini zaiflashtirishga qaratilgan», — deya xabar berdi Ukraina Qurolli kuchlari Bosh shtabi.
Bundan tashqari, Ukraina ko‘ngillilar armiyasi vakili Sergey Bratchukning ma’lumotlariga ko‘ra, Marino yaqinida joylashgan Ivanovskoye qishlog‘iga zarba berilgan. Uning so‘zlariga ko‘ra, u yerda «Rossiya Federatsiyasining 810-dengiz piyoda askarlari brigadasi joylashgan». O‘z navbatida, Ukraina Milliy xavfsizlik kengashi qoshidagi Dezinformatsiyaga qarshi kurash markazi rahbari Andrey Kovalenko zarba natijasida «Rossiya Federatsiyasining 810-brigadasida katta yo‘qotishlar yuz bergani» haqida gapirdi.
Gubernator v.b.: fuqarolik obektlari zarar ko‘rdi
Kursk oblasti gubernatori vazifasini bajaruvchi Aleksandr Xinshteynning aytishicha, Ivanovskoyega qilingan hujum natijasida fuqarolik obektlari, jumladan, Madaniyat uyi binosi zarar ko‘rgan. Maktab-internat, pochta bo‘limi va savdo markazining devorlari jiddiy shikastlangan, derazalari singan. Bundan tashqari, Xinshteynning ta’kidlashicha, «gaz quvurining bir qismida kichik avariya bo‘lgan».
Mahalliy aholi orasida jabrlanganlar borligi haqida ma’lumot kelib tushmagan.
Sirskiy Kursk oblastiga bordi
1 yanvar kuni Ukraina Qurolli kuchlari bosh qo‘mondoni Aleksandr Sirskiy Ukraina qo‘shinlari nazoratida bo‘lgan Rossiya Federatsiyasining Kursk oblasti hududiga tashrif buyurdi.
«Ukraina harbiylarining qahramonona harakatlari dushmanni o‘z hududida katta kuchlar guruhini ushlab turishga va zaxiralarni boshqa yo‘nalishlardan o‘tkazishga majbur qildi, sizning qat’iyatingiz va jasoratingiz tufayli dushmanning Kursk oblastidagi yo‘qotishlari 38 mingdan ortiq kishini tashkil etdi. mingdan ortiq texnika ham yo‘qotildi», — deb yozdi harbiy rahbar Telegramʼda.
Uning qo‘shimcha qilishicha, Kursk oblastida 700 nafar rus askari asirga olingan. Ular almashinuv fondini to‘ldirishdi, buning yordamida ukrainalik askarlarni vatanga qaytarish mumkin, dedi Sirskiy. U «okkupantlar qanday pasportga ega bo‘lishidan qat’i nazar, ularni yo‘q qilishni davom ettirishga» va’da berdi.
Sirskiy tomonidan e’lon qilingan kadrlarga qaraganda, u 225-hujumkor batalon, shuningdek, Ukraina Qurolli kuchlarining 82-havo hujumi brigadasi joylashgan joyga tashrif buyurdi.
