Fransiyadagi qamoqxonada mahbus besh kishini garovga oldi

Fransiyaning Arl shahridagi Bush-dyu-Ron markaziy qamoqxonasida mahbus bir necha kishini garovga oldi, deb xabar beradi Liberation.

Ma’lumotlarga ko‘ra, jami besh kishi garovga olingan: to‘rt nafar tibbiyot xodimi va bir nafar qamoqxona ishchisi. Keyinroq shifokorlardan biri qo‘yib yuborilgan va to‘rt kishi garovda qolgan.

Garovga olinganlar haqida Fransiya adliya vaziri Jyerald Darmanen ham ma’lum qildi. Ikki soat o‘tgach, u mahbus taslim bo‘lgani va hibsga olingani, jabrlanganlar yo‘qligi haqida X ijtimoiy tarmog‘idagi sahifasiga yozib qoldirdi. Ko‘ngilsiz voqeaning tafsilotlari hozircha ma’lum emas.

AFP ma’lumotlariga ko‘ra, mahbuslarning yonida o‘tkir tig‘li qo‘lbola jism bo‘lgan. Shuningdek, agentlikning ma’lum qilishicha, 37 yoshli mahbus ruhiy buzilishdan aziyat chekib keladi. RTL’ning yozishicha, u qurol qo‘llagan holda zo‘rlash jinoyatini sodir etgani uchun jazo muddatini o‘tayotgan bo‘lgan.

Eslatib o‘tamiz, oktyabr oxirlarida Rossiyaning Baykalorti o‘lkasida joylashgan Nerchinsk shahridagi 1-sonli axloq tuzatish markazidan to‘rt nafar maxbus qochib ketgandi. Federal jazoni ijro etish xizmati boshqarmasining («UFSIN») ma’lum qilishicha, ularning ikki nafari Chita va Amur oblastidan topilgan.