Navoiy viloyatining Xatirchi tumanida 9 yoshli qizni bosib o‘tib ketgan haydovchilarga sud hukmi o‘qildi. Kun.uz sud hujjati bilan tanishdi.
Sud hukmida keltirilishicha, 1976 yilda tug‘ilgan Nasimjon Amirov hamda 1976 yilda tug‘ilgan Faxriddin Amanbayev o‘zlarining boshqaruvlaridagi BYD mashinalarini Xatirchi tumani hududidan o‘tuvchi 4R48 avtomobil yo‘lining 126-127-kilometri oralig‘ida bir-birini quvib o‘tish maqsadida katta tezlikda boshqargan. Oqibatda piyodalar yo‘lagidan o‘tayotgan voyaga yetmagan Sh.Sh.ni Nasimjon Amirov mashinasi bilan urib, uning ortidan kelgan Faxriddin Amanbayev esa yiqilgan qizaloqni bosib o‘tib ketgan.
Sudda har ikki haydovchi aybiga iqrorlik bildirgan hamda mashinani katta tezlikda boshqarib, bir-birini quvib o‘tishga harakat qilganini tan olishgan.
Sud Faxriddin Amanbayev va Nasimjon Amirovni Jinoyat kodeksining 266-modda 2-qismida (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) nazarda tutilgan jinoyatni sodir qilganlikda aybli deb topgan. Ularning har biriga 2 yil transport vositasini boshqarish huquqidan mahrum qilgan holda 2 yil ozodlikdan mahrum qilish jazosi tayinlangan.
Mazkur YTH joriy yil 1 iyul kuni sodir bo‘lgandi. Oqibatda mashina tagida qolgan voyaga yetmagan Sh.Sh. voqea joyida vafot etgan. Haydovchilar mashinani aholi yashash hududida katta tezlikda boshqargan. Ularga nisbatan jinoyat ishi qo‘zg‘atilib, qamoq ehtiyot chorasi qo‘llangan.
Keyinchalik haydovchilardan biri 1 yilda 12 marta radarga tushgani, YTH sodir bo‘lgan piyodalar o‘tish joyiga esa 2024 yil 1-chorak yakuniga qadar o‘rnatilishi kerak bo‘lgan tugmali svetofor mablag‘ ajratilmagani sababli o‘rnatilmay qolgani ma’lum bo‘lgandi.
