Xitoylik mutaxassislar dunyodagi eng katta suvosti Tszinan-Xuangan tunneli qurilishini yakunladi. New Atlas’ning yozishicha, 3290 metrli tunnel Xuanxe daryosi ostidan, 30 metrli chuqurlikda o‘tgan.

Qayd etilishicha, suvosti tunneli uzunligi 5755 metrga teng Xuangan-Roud-Kross-Xuan magistralining tarkibiga kiradi. Tunneldan o‘tadigan olti polosali yangi shosse orqali turli transport vositalari soatiga 60 kilometrgacha tezlikda harakatlanishi mumkin bo‘ladi.

Tunnel diametri 17 metrni tashkil etadi — bu uning Buyuk Britaniya va Fransiyani bog‘lab turuvchi La-Mansh ostidan o‘tgan mashhur Yevrotunneldan ham kattaligini anglatadi (uning diametri 7,6 metrga teng).

Xitoy tunnelining qurilishida dunyodagi eng katta «Shanxe» burg‘ilovchi mashinasidan foydalanilgan — uning balandligi besh qavatli uyniki bilan teng. Mashina 7510 ot kuchiga ega, aylanuvchi momenti esa 35 ming kilonyuton-metrni tashkil etadi.

Qurilish davomida maxsus avtomatik havo yostiqchalari tizimidan foydalanilgan bo‘lib, u bosimni barqarorlashtirishga, konstruksiyani ushlab turish va suv bosish ehtimolining oldini olishga yordam bergan.

Tunnel bir vaqtning o‘zida ikkita rekord o‘rnatdi: birinchisi — diametri bo‘yicha, ikkinchisi — qurilish vaqti bo‘yicha. Bu qadar katta loyiha 110 kun ichida yakunlandi.