Jizzax viloyatida tadbirkorning binosi uchun foydalanishga ruxsatnoma olib berishni va’da qilgan shaxs ushlangan. Bu haqda Bosh prokuratura huzuridagi departament xabar bermoqda.

Ma’lum qilinishicha, departamentning Jizzax viloyati boshqarmasi va DXX xodimlari hamkorligida tadbirkorlik sub’yektlari huquqlarini himoya qilish yuzasidan tezkor tadbir o‘tkazilgan.

Tadbirda “J.G.” MChJ xodimi F.X. tadbirkor D.M.ning ishonchiga kirib, unga tegishli G‘allaorol tumanida joylashgan umumiy ovqatlanishga mo‘ljallangan qurilish obektini go‘yoki Qurilish-nazorat inspeksiyasida ishlovchi tanishlari orqali foydalanishga ruxsatnoma olib berishi evaziga 5 500 dollar olgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.