“Energetika sohasini subsidiyalash 2028 yildan to‘xtatiladi” – Jamshid Qo‘chqorov

Bugun, 18 dekabr kuni Senat yalpi majlisida bosh vazir o‘rinbosari – iqtisodiyot va moliya vaziri Jamshid Qo‘chqorov chiqish qildi. U “2025 yil uchun O‘zbekiston Respublikasining Davlat budjeti to‘g‘risida”gi qonun yuzasidan ma’lumot berdi. Senatorlar vazirdan nima uchun narxlar oshganiga qaramay energetika sektorini subsidiyalash davom etayotganini so‘radi.

“Nima uchun tariflar oshirilsa ham, budjetdan hali ham subsidiyalar bor? Birinchidan, bizning tariflarimiz haligacha xarajatlarni to‘liq qoplaydigan darajaga chiqqani yo‘q. Ikkinchidan, gazning ma’lum qismini import qilyapmiz.

Shuning uchun tariflarni to‘liq o‘zini o‘zi qoplaydigan darajaga o‘tkazmasdan boshqa ilojimiz yo‘q. Shu nuqtayi nazardan joriy yilda tariflar oshgan bo‘lsa ham, Vazirlar Mahkamasining qarorida kelgusi yil 1 apreldan tariflarni yana oshirish takliflari ma’qullangan. Kelgusi yil, nasib bo‘lsa, 1 apreldan [elektr energiyasi va gaz] tariflari oshadi.

Umuman, subsidiyalar haqida gapiradigan bo‘lsak, kelgusi yil uchun budjet loyihasida gaz bilan elektrga subsidiyalar miqdori 7,5 trln so‘m bo‘ladigan bo‘lsa, joriy yilda bu 12 trln so‘m edi. Ya’ni kamayib boryapti”, – dedi Qo‘chqorov.

Uning qo‘shimcha qilishicha, subsidiyalash 2025-2026 yillarda ham davom etadi, 2027 yilda esa “nasib bo‘lsa keskin kamayadi”. 2028 yildan boshlab energetika sektoriga subsidiya berilmaydi, deya ma’lum qildi hukumat a’zosi.

Ma’lumot uchun, 2025 yilda davlat budjeti hisobidan ajratilishi belgilangan subsidiyalarning umumiy qiymati 28,3 trln so‘mni tashkil etishi kutilyapti. Bunda energetika sohasi uchun 12,3 trln so‘m, xususan, gaz sotib olish va sotishdagi tafovutni qoplash uchun 7 trln so‘m ajratilishi ko‘zda tutilgan.