Yevropa Ittifoqida tug‘ilish darajasi rekord darajada pasaydi

Yevropa Ittifoqida 2023 yilda rekord darajada kam chaqaloq tug‘ildi, deb yozdi Financial Times nashri Eurostat ma’lumotlariga tayanib.

Statistika xizmati 4 million chaqaloq tug‘ilishini bashorat qilgan edi, biroq 3,665 million tug‘ildi, bu ma’lumotlar yig‘ish boshlangan 1961 yildan beri eng past ko‘rsatkichdir. Bu ko‘rsatkich 2022 yil darajasiga nisbatan 5,5 foizga kamaydi, bu ham butun kuzatishlar tarixidagi yillik ko‘rsatkichlarda eng jiddiy pasayish bo‘ldi.

Nashrning qayd etishicha, Yevropa Ittifoqida tug‘ilishning eng yuqori ko‘rsatkichi 1960 yillarning o‘rtalariga to‘g‘ri kelgan, hozir esa bu ko‘rsatkich keskin pasaygan va taxminan AQSh bilan bir xil darajada. FT qo‘shimcha qiladiki, tug‘ilishning past darajasi budjetga yuklamani oshiradi, chunki mehnatga layoqatli aholi soni kamayadi, sog‘liqni saqlash va pensiya xarajatlari oshadi.

Birlashgan Millatlar Tashkilotining demografiya bo‘yicha xodimi Guanyu Chjan so‘zlariga ko‘ra, Yevropa Ittifoqi aholisining farzand ko‘rish yoki ko‘rmaslik haqidagi qaroriga «kelajak haqidagi noaniqlik, yashash va uy-joy narxining oshishi, shuningdek, ko‘plab global inqirozlar, jumladan, koronavirus pandemiyasi, iqlim o‘zgarishi va geosiyosiy keskinliklar ta’sir qilishi mumkin».

Tug‘ilishning pasayish tendensiyasi Gretsiya, Italiya, Ispaniya, Polsha, Finlyandiya va Boltiqbo‘yi mamlakatlarida ko‘proq kuzatilgan. U yerda so‘nggi o‘n yil ichida tug‘ilish darajasi kamida 25 foizga kamaygan.