JAR sharqida 150 nafardan ortiq noqonuniy konchi politsiya va qutqaruvchilar hamkorligida to‘rt kun oldin avariya sodir bo‘lgan tashlandiq oltin shaxtasidan olib chiqildi, deb xabar beradi BBC.

«Mpumalanga provinsiyasining Sabi shahri hududida joylashgan, chuqurligi 150 metrga yetadigan shaxtadan 153 kishi chiqarib olindi. Shuningdek, uch nafar konchining jasadi ham yer yuzasiga olib chiqildi. Noqonuniy migrantlarning barchasi qo‘lga olingan. Ularning aksariyati qo‘shni Mozambik fuqarolaridir», — deyiladi xabarda.

Konchilarning ma’lum qilishicha, ular qurollangan jinoyatchilar tomonidan yer ostida zo‘ravonlik bilan ushlab turilib, oltin qazishga majburlangan. Politsiya va hukumat ko‘rsatmalarni tekshirish bilan shug‘ullanmoqda.

Ta’kidlanishicha, JAR shimolidagi Stilfonteyn shahrida joylashgan tashlandiq oltin konida inqirozli vaziyat saqlanib qolmoqda — u yerda noqonuniy ishchilarning katta guruhi hibsga olinish va deportatsiyadan qo‘rqib yer yuzasiga chiqmay kelyapti. Politsiya va armiya uch oydan beri shaxtani bloklab qo‘ygan. Ayni vaqtda u yerdan 1387 nafar noqonuniy migrant olib chiqilgan bo‘lib, ularning barchasi qo‘lga olingan. Turli ma’lumotlarga ko‘ra, shaxtada 300 nafardan 4 ming kishigacha odam bo‘lishi mumkin. Yer ostida ishchilar bilan birga qurollangan soqchilar ham borligi aytilmoqda.