Toshkent viloyatida bemor shifokor shilqimligiga uchradi. Kun.uz mazkur ish doirasida chiqarilgan sud qarori bilan tanishdi.

Sud qarorida keltirilishicha, 1 dekabr kuni soat 14:30 larda Toshkent viloyati Yangiyo‘l shahrining Fayzli mahallasidagi stomatologiya klinikasida A.I. tishini davolatish uchun kelgan mijoz G.E.ga (ayol kishi) shahvoniy shilqimlik qilgan. U ayolning qo‘lidan ushlab, sochlarini silagan hamda nomaqbul so‘zlar aytgan.

Sud majlisida A.I. aybiga qisman iqror bo‘lib, huquqbuzarlik faktini tan olgan. Ayol esa huquqbuzarga nisbatan qonuniy jazo berishni so‘ragan.

Jinoyat ishlari bo‘yicha Yangiyo‘l shahar sudining 5 dekabrdagi qarori bilan A.I. MJtKning 41-1-moddasi (Shahvoniy shilqimlik qilish) 1-qismida nazarda tutilgan huquqbuzarlikni sodir etgan deb topilgan. Unga 5 sutka ma’muriy qamoq jazosi tayinlangan.

Oldinroq Toshkent shahridagi “PLAN BABY” xususiy klinikasida lor shifokori muolaja paytida ayol mijozini o‘pib olgani uchun jazolangandi.