Suriya prezidenti Bashar Asad kuchlariga qarshi kurashayotgan jangarilar guruhi mamlakatning eng katta shahri Halabga kirganini e’lon qildi. Bu haqda CNN isyonchilar bayonotiga tayanib yozdi. Ushbu ma’lumotni mustaqil manbalar orqali tasdiqlash imkonsiz.

«Bizning kuchlarimiz Halab shahriga kirishni boshladi», deb telekanal yangi tashkil etilgan isyonchilar koalitsiyasi Harbiy operatsiyalar qo‘mondonligi bayonotidan iqtibos keltirdi.

«Suriya Inson huquqlari kuzatuv guruhi» (Buyuk Britaniyada joylashgan) ham jangarilar Halabga kirganini xabar qildi. Shahardagi guvohlarning AP agentligiga aytishicha, aholi raketa hujumlari va o‘qqa tutilgani uchun shaharning g‘arbiy chekkasidagi hududlardan qochib ketmoqda.

29 noyabr kuni ertalab Turkiyaning Anadolu davlat agentligi jangarilar Halab chekkasiga bir kilometr uzoqlikda yaqinlashgani haqida xabar berdi. Ikki kun ichida qurolli guruhlar Halab va Idlib viloyatlarida 56 ta aholi punktini nazorat ostiga oldi, shuningdek, Asad kuchlariga tegishli og‘ir qurollar, omborlar va jihozlarni qo‘lga kiritdi.

Hukumat kuchlari 29 noyabr kuni e’lon qilgan bayonotda Halab atrofidagi qishloqlarda jangarilar bilan to‘qnash kelgani, raqibning dronlari va og‘ir texnikasi yo‘q qilingani haqida xabar berdi. Shuningdek, ular jangarilarni muvaffaqiyatlari haqida yolg‘on ma’lumot tarqatishda aybladi.

Halab Suriyaning 3 milliondan ortiq odam istiqomat qilgan eng katta shahri bo‘lib, 2011 yilda fuqarolar urushi boshlanganidan beri hukumat kuchlari va qurolli muxolifat guruhlari o‘rtasidagi qarama-qarshilik markaziga aylandi.

2016 yilda Suriya hukumati kuchlari va Rossiya Qurolli kuchlarining hujumi natijasida jangarilar Halab chekkasiga quvildi. 2020 yilda ular Halabdan to‘liq quvib chiqarilgan edi.

Suriyadagi isyonchilar 27 noyabr kuni Halab viloyatining g‘arbiy qismida Bashar Asad hukumat kuchlariga qarshi keng ko‘lamli hujum boshladi. Bu mintaqada so‘nggi to‘rt yil ichida birinchi yirik operatsiya ekani ta’kidlanmoqda.