Mahalliy vaqt bilan soat 20:54 dan boshlab ob-havo sharoiti yomonlashgani sababli Farg‘ona xalqaro aeroportida havo kemalarini qabul qilishga vaqtinchalik cheklovlar joriy etildi. Bu haqda Uzbekistan Airports matbuot xizmati xabar berdi.

Qayd etilishicha, cheklovlar vaqtida barcha reyslar muqobil aerodromlarga yo‘naltiriladi.

«Uzbekistan Airways aviakompaniyasining Istanbul—Farg‘ona yo‘nalishidagi HY-278 reysi Namangan muqobil aeroportiga yo‘naltirildi», — deyiladi xabarda.

Eslatib o‘tamiz, 21 noyabr kuni ham ob-havo sharoiti yomonlashgani sababli Farg‘ona xalqaro aeroportida havo kemalarini qabul qilishga vaqtinchalik cheklovlar joriy etilgandi.