Hozirda Kiyev o‘zining bir nechta ballistik raketasiini yaratmoqda. Bu haqda Ukraina strategik sanoat vaziri o‘rinbosari Anna Gvozdyarga tayanib The Wall Street Journal xabar berdi.

Nashr manbalariga ko‘ra, Ukraina dushman hududi ichkarisiga zarba berishga qodir raketalarni yaratish ustida faol ish olib bormoqda. Dasturning aksariyat tafsilotlari sir saqlanyapti, ammo ukrainalik rasmiylar bu kabi qurol tez orada qo‘shinlarga taqdim etilishi mumkinligini ma’lum qildi. Avgust oyida Ukraina bu turdagi raketalarning ilk sinovini o‘tkazgan edi.

«Siz keyingi yilda yoki joriy yil oxirida keng ko‘lamli raketa dasturi haqida xabar topasiz», — deydi Ukraina mudofaa vaziri Rustem Umerov.

Ukraina prezidenti maslahatchisi Aleksandr Kamishinning so‘zlariga ko‘ra, dasturni amalga oshirishdagi to‘siqlardan biri moliyalashtirishdir. Uning ta’kidlashicha, Kiyevda yetarlicha mablag‘ mavjud emas. Xususan, Ukraina urush davomida o‘zining «Neptun» raketasidan cheklangan miqdorda foydalangan, rasmiylarning aytishicha, moliyalashtirishning yetishmasligi ishlab chiqarishni to‘xtatib turibdi.

Harbiy aviatsiya bo‘yicha mutaxassis Duglas Barrining tushuntirishicha, ballistik raketalarni ishlab chiqarish juda qimmatga tushadi, chunki ular tayyorlanadigan materiallar Yer atmosferasiga qaytayotganda o‘ta yuqori haroratga turib berishi kerak.

Yana bir muammo — qurollarni ommaviy ishlab chiqarish jarayonidir. Zelenskiy Ukraina 2024 yilda 100 ta raketa ishlab chiqarganini ma’lum qilgandi. Butun dunyo bo‘ylab raketa ishlab chiqaruvchilar ehtiyot qismlar, jumladan, dvigatellarning barqaror yetkazib berilishida muammolarga duch kelmoqda. Ukrainada esa ishchilarning yetishmasligi va Rossiyaning infratuzilmaga muntazam hujumlari ham qo‘shimcha qiyinchilik tug‘dirmoqda.

NATO Parlament Assambleyasidagi Ukraina delegatsiyasi rahbari Yegor Chernevning qayd etishicha, ballistik raketalar dasturi ehtiyot qismlarni yetkazib berishdagi muammolarga qaramay, yakunlanish arafasida. «Ishoning, tez kunda nafaqat Ukraina, balki Rossiya Federatsiyasi ham ko‘radigan aniq natijalar bo‘ladi», — deydi u ukrain televideniyesiga bergan intervyusida.

AQSh bo‘lsa Ukraina o‘z e’tiborini uzoq masofaga uchishga qodir dronlarga qaratishi kerak deb hisoblamoqda. Mudofaa vaziri Lloyd Ostin ukrain dronlari dasturi moliyaviy nuqtai nazardan ballistik raketalardan ko‘ra o‘zini ancha oqlaganini aytgan

Manbalarning ma’lum qilishicha, yaqinda AQSh 2,4 milliard dollar miqdorida yordam ko‘rsatishga oid paketni ma’qullagan, u uzoq masofaga uchuvchi dronlar va boshqa shu turdagi qurollarga mablag‘ yo‘naltirishni o‘z ichiga oladi.