Internetda 2005 yilda tug‘ilgan yigit va 2008 yilda tug‘ilgan qizning 1 yoshli egizak farzandlari borligi haqidagi videorolik tarqaldi. Bolalar ombudsmani holatni o‘rgandi.

Video joriy yilning 21 noyabr kuni Toshkentda instabloger tomonidan tasvirga olingan va uning 1 milliondan ortiq obunachilari bor sahifasiga joylangan. Videoda insta-bloger yoshlarni 15 yoshda farzand ko‘rgan ota-ona deb talqin qilgan va “hali ham o‘tiribsizlarmi, uylaninglar tezroq" deb kuzatuvchilarni erta turmush qurishga chaqirgan.

Bolalar ombudsmani mazkur holat yuzasidan surishtirov olib bordi. “Ma’lum bo‘lishicha, rolikda o‘zini 2005 yilda tug‘ilganini aytgan yigit aslida 2003 yilda, 2008 yilda tug‘ilganini aytgan qiz esa 2005 yilda tug‘ilgan bo‘lib chiqdi. Holat tegishli tashkilotlar tomonidan nazoratga olindi va ayni paytda rolik tarmoqlardan o‘chirildi. Yoshlari haqida kuzatuvchilarga noto‘g‘ri ma’lumot bergan er-xotin esa ogohlantirildi”, - deydi Kun.uz saytiga izoh bergan Bolalar ombudsmani Surayyo Rahmonova.

Nega faqat ogohlantirish?

O‘zbekistonda nikoh yoshi 18 yosh etib belgilangan. Bu o‘rinda yosh er-xotinlar o‘zlarini 18 yoshga yetmaganliklari haqidagi noto‘g‘ri ma’lumot berish bilan bu noqonuniy harakatni targ‘ib qilishgan. Ammo O‘zbekiston qonunchiligida erta nikohni targ‘ib qilganlik uchun alohida normalar yo‘q. Shu bois, er-xotinlarga nisbatan faqat ogohlantirish chorasi qo‘llangan.

Erta nikohni targ‘ib qilish mavzusida rolik olib, millionlab auditoriyaga taqdim etgan insta-bloger ham ayni vaqtda jazosiz qoladi.

Bolalar ombudsmani Surayyo Rahmonova Kun.uz muxbiri bilan suhbatda erta nikoh targ‘iboti uchun ham javobgarlikni joriy qilish ustida ish olib borilayotganini ma’lum qildi.

Ma’lumot o‘rnida, O‘zbekistonda bir yilda 22 ta erta nikoh holatlari aniqlanib, 41 nafar shaxs ma’muriy javobgarlikka tortilgan, 55 ta erta nikoh holatlarining esa oldi olingan.