Ursula fon der Lyayyen boshchiligidagi Yevropa komissiyasi 2024 yil 1 dekabrdan yangilangan tarkib bilan ish boshlashga tayyorlanmoqda. OAV xabarlariga ko‘ra, Yevroparlamentdagi siyosiy guruhlar yetakchilari 20 noyabr, chorshanba kuni Yevrokomissiyaning yangilangan tarkibi bo‘yicha kelishuvga erisha olgan.

Parlament yalpi majlisida yakuniy ovoz berish 27 noyabr kuni Strasburgda bo‘lib o‘tadi. Aynan shu yig‘ilishda yangi yevrokomissarlarning nomzodlari rasman tasdiqlanadi, shundan so‘ng organ o‘z ishini boshlashi mumkin bo‘ladi.

Yevrokomissarlikka nomzodlar bo‘yicha bahslar

Yevroparlamentdagi eshituvlar chog‘ida Yevrokomissiya raisi o‘rinbosari lavozimiga olti nomzod qo‘llab-quvvatlov masalasida qiyinchiliklarga duch keldi. Shu tariqa, sotsialistlar va sotsial-demokratlar mamlakatdagi hukmron o‘ng «Italiya birodarlari» partiyasidan italiyalik Raffaele Fitto nomzodini ma’qullashni istamadi.

Shu bilan birga, markazchi o‘ng «Yevropa xalq partiyasi» (YeXP) ittifoqi Ispaniyaning amaldagi atrof-muhit vaziri va sotsialist Teresa Riberaning nomzodiga qarshi chiqdi, u yaqinda Valensiyadagi falokatli suv toshqini paytida tezkor sa’y-harakatlarni amalga oshirmaganlikda ayblanmoqda.