Avstraliyada 16 yoshdan kichkinalar ijtimoiy tarmoqlardan foydalanishi cheklanadi. Texnologik kompaniyalarga katta jarimalar tahdid solmoqda

Avstraliya hukumati 16 yoshgacha bo‘lgan bolalarning ijtimoiy tarmoqlardan foydalanishini cheklovchi qonunni qabul qiladi. Bu haqda mamlakat bosh vaziri Entoni Albaneze ma’lum qildi.

Hukumat rahbarining ta’kidlashicha, Avstraliya «16 yoshdan kichiklar ijtimoiy tarmoqlardan foydalanishini cheklovchi dunyodagi muhim qonunni» qabul qiladi. «U internetdagi xavfsizlikni nazorat qiluvchi amaldagi qonunchilikka o‘zgartirishlar kiritadi, bu esa avstraliyalik yoshlarning rivojlanishning muhim bosqichida yanada ishonchli himoya qilinishini ta’minlaydi», — deyiladi bayonotda.

Shuningdek, Albanezening so‘zlariga ko‘ra, mamlakat hukumati texnologik kompaniyalar va ijtimoiy tarmoqlar administratsiyalaridan 16 yoshdan kichiklar akkuant hamda sahifalar ocha olmasligini ta’minlash uchun oqilona choralar ko‘rishini talab qiladi.

«Hukumat yangi qonunni buzganlarni qattiq jazolaydi va raqamli platformalar buning evaziga 32,5 million dollargacha jarimaga tortiladi», — deydi bosh vazir.

Avstraliya hukumati rahbarining qayd etishicha, yangi qoidalar Snapchat, TikTok, Instagram va X kabi ijtimoiy tarmoqlarga taalluqli. Yoshlar oldingidek Google Classroom va YouTubeʼdan, shuningdek, xabar almashish va onlayn o‘yin vositalaridan foydalanishlari mumkin bo‘ladi.

Avvalroq Norvegiya bosh vazir Yonas Gar Styore mamlakat hukumati 15 yoshgacha bo‘lgan bolalarga ijtimoiy tarmoqlardan foydalanishni cheklash niyatida ekanini ma’lum qilgandi. Hukumat rahbarining aytishicha, bu «oson kurash» bo‘lmaydi, ammo «bolalar ijtimoiy tarmoqlardagi zararli kontentlardan himoyalanishi kerak».

Kuni kecha esa Britaniyada 16 yoshgacha bo‘lgan bolalarni ijtimoiy tarmoqlardan cheklash masalasi ko‘rib chiqilishi to‘g‘risida xabar berilgandi. O‘z navbatida Freeths yuridik firmasi vakili Ion Silverman ijtimoiy tarmoqlarning taqiqlanishini «muammolar dengizidan tomchi» deb atab, o‘smirlar internet materiallariga kirishning boshqa usullarini topishini ma’lum qilgan.