Qozog‘istonning Kaspi fintex kompaniyasi «Humo» to‘lov tizimini xususiylashtirish jarayonidagi ishtirokini to‘xtatganini ma’lum qildi.
O‘z navbatida kompaniya O‘zbekiston raqamli transformatsiyasida ishtirok etish uchun imkoniyatlarni izlashda davom etishini bildirgan.
Ma’lumot uchun, 2024 yilda Kaspi.kz AQShning NASDAQ fond birjasida IPO o‘tkazdi va bu so‘nggi ikki yil ichidagi eng yirik ommaviy takliflardan biriga aylandi. Ayni paytda kompaniyaning kapitallashuvi taxminan 24 milliard dollarni tashkil etadi.
«Humo» to‘lov tizimi haqida
“Milliy banklararo protsessing markazi” AJ – bank to‘lov kartalariga asoslangan «Humo» to‘lov tizimi O‘zbekistonda va xorijda operatsiyalarni amalga oshirishga mo‘ljallangan bo‘lib, O‘zbekiston to‘lov tizimining tarkibiy qismi hisoblanadi. Jamiyat to‘lov tizimining operatori faoliyatini amalga oshirishga doir Markaziy bankning tegishli litsenziyasiga ega. Ustav kapitali: 155,4 mlrd so‘m;
Ayni paytda 27 milliondan ortiq «Humo» kartalari chiqarilgan bo‘lib, 210 mingdan ortiq terminal va 6,4 mingdan ortiq bankomatlar o‘rnatilgan.
Aprel oyida O‘zbekistonda yangi xususiylashtirish dasturi e’lon qilingandi. Undan bir qator yirik davlat korxonalari qatorida “Humo” to‘lov tizimini ham xususiylashtirish rejalari o‘rin olgan.
Iyul oyida Davaktiv “Humo” davlat to‘lov tizimini sotib olish uchun arizalarni qabul qilish boshlanganini e’lon qildi. Davlat ulushi «muzokaralarga ommaviy ravishda taklif qilish» usuli orqali sotilishi aytilgandi. Avgust oyida Kaspi ushbu jarayonda ishtirok etish niyati borligini e’lon qildi.
