YouTube videoservisi uzun videolarni tomosha qilishning Shors’ga o‘xshash yangi formatni testdan o‘tkazmoqda.

Qayd etilishicha, sahifa yuqoriga siljitilgandan keyin avtomatik ravishda qo‘yiladigan navbatdagi video paydo bo‘ladi. Mazkur yangilik yangi kontentni tavsiya qilish tizimini joriy etishga oid eksperiment doirasida sinovdan o‘tkazilyapti.

YouTubeʼdagilarga ko‘ra, «Android foydalanuvchilarining kichik guruhi test jarayonlarida qatnashmoqda, bu ularga yangi videolarni to‘liq ekranda ham, portret rejimida ham qo‘yish uchun sahifani uchun yuqoriga surish imkonini beradi».

Yangi funksiya YouTubeʼdagi kontent tomosha qilishga yondashuvni o‘zgartirishi mumkin. Hozir foydalanuvchi sarlavha va muqovadan, shuningdek, tavsiya va obunalaridan kelib chiqib, video tanlaydi.

Shors qisqa roliklarida esa foydalanuvchilar yangi video ko‘rish uchun lentani yuqoriga surishi kifoya. Bunday format foydalanuvchi harakatini minimallashtiradi va ancha samarador hisoblanadi, chunki u algoritmga foydalanuvchi afzal ko‘rgan kontentga tezroq moslashish imkonini beradi. Ammo bu YouTube formatini ekotizim sifatida o‘zgarishiga olib kelishi mumkin.

Eslatib o‘tamiz, 2020 yilda YouTube videoxostingi Xitoyning TikTok ilovasiga raqobatchi sifatida Shors qisqa videolar servisini taqdim etgandi. YouTube Shors servisi AQSh hukumati va TikTok o‘rtasidagi qarama-qarshilik fonida ishga tushgan edi.