Germaniyada Germaniya Sotsial-demokratik partiyasi (GSPD), Erkin demokratik partiya (EDP) va «Ittifoq-90/«yashillar» partiyasidan tashkil topgan hukmron «svetofor koalitsiyasi» parchalandi. Germaniya kansleri Olaf Shols mart oyida muddatidan oldin saylov o‘tkazish imkoniyatiga ega bo‘lish uchun 15 yanvar kuni Bundestagda o‘z hukumatiga ishonch masalasini ovozga qo‘yadi. Bu haqda 6 noyabr, chorshanba kuni kechqurun Shols ma’lum qildi.
Kansler vitse-kansler Robert Habekning Germaniyaning kelajakdagi siyosiy yo‘nalishiga tezkorlik bilan aniqlik kiritish zarur degan fikrga qo‘shilganini aytdi. Rojdestvoga qolgan haftalar ichida Shols Bundestagda tezkor qabul qilishni talab etuvchi, xususan, sanoatni favqulodda qo‘llab-quvvatlash, shuningdek, pensiyalarni barqarorlashtirish choralarini ko‘rishni talab qiladigan barcha qonun loyihalarini ovozga qo‘yish niyatida.
Shols moliya vaziri Lindnerni ishdan bo‘shatdi
Bundan oldin Shols EDP raisi bo‘lgan moliya vaziri Kristian Lindnerni ishdan bo‘shatishini e’lon qildi.
O‘sha oqshom Lindnerning o‘zi Sholsni qizil-yashil-sariq koalitsiyaning qulashida aybladi. U erkin demokratlar yangi saylovlardan so‘ng boshqa hukumatda Germaniya taqdiri uchun mas’uliyatni o‘z zimmasiga olishga tayyorligini ta’kidladi.
Koalitsiya bo‘yicha hamkorlar uzoq vaqtdan beri iqtisodiy, moliyaviy va ijtimoiy siyosat masalalari bo‘yicha chuqur qarama-qarshiliklarga bo‘lingan, shuning uchun ular Germaniyaning 2025 yilgi budjeti bo‘yicha kelisha olmadilar.
O‘tgan hafta oxirida moliya vaziri Kristian Lindnerning Germaniyaning iqtisodiy, moliyaviy va ijtimoiy siyosatini tubdan o‘zgartirish talabi bilan kansler Sholsga yo‘llagan maktubi oshkor bo‘lgach, ular o‘rtasidagi mojaro yangi kuch bilan avj oldi. Bu xabar GSPD va «yashillar» tomonidan keskin tanqidga uchradi, ular erkin demokratlarni mamlakat oldida turgan muammolarga yechim topish uchun birgalikda ishlashni istamaslikda va koalitsiyani buzish uchun sabab topishga harakat qilishda aybladilar.
Lindner Bundestagga muddatidan oldin saylov o‘tkazishni taklif qildi
Hukmron koalitsiyada vakillik qilayotgan partiyalar raislari va ularning parlamentdagi fraksiyalari rahbarlaridan iborat koalitsiya qo‘mitasining 6 noyabr oqshomida federal kansler idorasida bo‘lib o‘tgan yig‘ilishida Germaniya moliya vaziri va EDP raisi Kristian Lindner koalitsiya hamkorlarini mamlakatda muddatidan oldin parlament saylovlarini o‘tkazishga rozi bo‘lishga taklif qildi. Bu holatda, OAV yozganidek, u 2024 yil uchun qo‘shimcha budjetni qabul qilishga tayyor bo‘lardi va parlament saylovlari o‘tkazilgunga qadar hamda Germaniyaning yangi federal hukumati shakllanmaguncha o‘tish davridagi vazirlar mahkamasi tarkibida qoladi.
