Rossiyada «ChGK» o‘yinchilari uyushmasi «nomaqbul tashkilot» deb e’lon qilindi

Rossiya Federatsiyasi Bosh prokuraturasi Lixtensheynda ro‘yxatdan o‘tgan Intellektual o‘yinlar xalqaro assotsiatsiyasi (Internationale Assoziation für Intellektuelle Spiele, IAIS)ni «nomaqbul tashkilot» deb e’lon qildi. IAIS «Internet tarmog‘ida Rossiya rahbariyatini obro‘sizlantirishga qaratilgan ma’lumotlarni tarqatadi», deya ma’lum qildi Rossiya idorasi 5 noyabr, seshanba kuni Telegramʼda. Bundan tashqari, Bosh prokuratura Intellektual o‘yinlar xalqaro assotsiatsiyasi Rossiya Federatsiyasida «chet el agentlari» sifatida tan olingan odamlarni «faol qo‘llab-quvvatlayotganini» da’vo qilmoqda.

RFda IAIS Rossiyaga qarshi kampaniyalarda qatnashishda ayblandi

Shuningdek, idora ma’lum qilishicha, 200 dan ortiq ishtirokchilarni birlashtirgan «Chto? Gde? Kogda?» («ChGK»), «Breyn-ring» va «Svoya igra» ommaviy intellektual o‘yinlarining sport versiyalari Yevropa, Osiyo va Shimoliy Amerikada go‘yoki «Rossiyada norozilik va buzg‘unchi g‘oyalarni targ‘ib qilishga qaratilgan» Rossiyaga qarshi xorijiy kampaniyalarda qatnashmoqda.

Bundan tashqari, IAIS'ni «nomaqbul tashkilot» deb tan olish haqidagi bayonotda Rossiya Federatsiyasi va Belarus jamoalarining xalqaro turnirlarda o‘z mamlakatlari bayroqlari ostida ishtirok etishi taqiqlangani ko‘rsatilgan.

Intellektual o‘yinlar xalqaro assotsiatsiyasi 2021 yilda «Chto? Gde? Kogda?» televiktorinasi ishtirokchilari tomonidan tashkil etilgan bo‘lib, ular Andrey Kozlov boshchiligidagi «Chto? Gde? Kogda?» Rossiya xalqaro klublari assotsiatsiyasining siyosatidan norozi. Boshqa narsalar qatorida, o‘yinchilar «ChGK»ning Birinchi kanal bilan aloqalarini tanqid qilishgan.