Turkiy davlatlar tashkilotining (TDT) navbatdagi XI sammiti 6 noyabr kuni Qirg‘iziston poytaxti Bishkekda «Turk dunyosini mustahkamlash: iqtisodiy integratsiya, barqaror rivojlanish, raqamli kelajak va barcha uchun xavfsizlik» mavzusida bo‘lib o‘tadi.

Sammitda tashkilotga a’zo bo‘lgan beshta davlat: Turkiya, Ozarboyjon, Qozog‘iston, Qirg‘iziston va O‘zbekiston rahbarlari, shuningdek, TDT kuzatuvchi-mamlakatlari rahbarlari ishtirok etadi.

Davlat rahbarlari TDT doirasidagi ko‘ptomonlama hamkorlikni yanada rivojlantirish masalalarini muhokama qiladi, tashkilotning joriy kun tartibidagi dolzarb masalalar bo‘yicha qarorlar qabul qiladi, shuningdek, bir qator ko‘p tomonlama hujjatlarni, jumladan, yakuniy deklaratsiyani imzolaydi.

2025 yilda Turkiy davlatlar tashkilotiga raislik Qirg‘iziston Respublikasiga o‘tadi.