Jadallik bilan rivojlanib borayotgan sun’iy intellekt tufayli Yevropada 2027 yilga borib 83 millionta ish o‘rni tugatiladi. Bu haqda Jahon iqtisodiy forumi prognozlariga tayanib, Euronews xabar berdi.

Qayd etilishicha, 2030 yilga borib 94 million yevropalik ishchi avtomatlashtirishning rivojlanishi sabab qayta tayyorlovga muhtoj bo‘ladi. Ishchilariga sun’iy intellekt xavf tug‘dirayotgan sohalar quyidagilar: mehmonxona va umumiy ovqatlanish biznesi (94 foiz), san’at (80 foiz), ulgurji va chakana savdo (68 foiz), qurilish (58 foiz), shuningdek, transport va logistika (50 foiz).

«2030 yilga borib 21 million kishi o‘z sohasini o‘zgartirishga majbur bo‘lishi mumkin. Ushbu insonlarning aksariyat qismi oliy ma’lumotga ega emas», — deyiladi xabarda.

Shu bilan birga, Jahon iqtisodiy forumi ma’lumotlariga ko‘ra, yaqin yillarda boshqa yo‘nalishlarda ish o‘rinlari soni sezilarli darajada oshishi kutilmoqda: 69 millionga yaqin yangi vakansiyalar paydo bo‘ladi. Ammo Yevropada mazkur ish o‘rinlari notekis taqsimlanishi mumkin: yevropaliklarning 40 foizga yaqini mehnat bozori qisqaradigan hududlarda qolib ketadi. Tadqiqotda mazkur mintaqalarga yordam bo‘lishi uchun masofadan turib ishlashni rag‘batlantirish taklif etilmoqda.

«Ayni vaqtda Yevropada mehnat unumdorligi Amsterdam, Kopengagen, London, Madrid, Myunxen va Parij kabi bir nechta mehnat bozorlarida jamlangan», — deya ta’kidlanadi xabarda. Mazkur shaharlarda Yevropa aholisining 20 foizi yashaydi, ammo YaIMning 43 foizi, ish o‘rinlari o‘sishining 35 foizi ular hisobiga to‘g‘ri keladi.