Avstraliyada oyog‘i yuqoriga qaragan holda toshlar orasida yetti soat qolib ketgan ayol qutqarib olindi, deb xabar beradi The Guardian.

Ma’lum qilishicha, Matilda Kempbell tasodifan tushirib yuborgan telefonini olaman deb toshlar orasidagi uch metrli yoriqqa tushib ketgan. Voqea Yangi Janubiy Uelsda sodir bo‘lgan — og‘irligi yarim tonnaga yetadigan tosh ayolni qisib qolgan.

Avvaliga uning do‘stlari mustaqil ravishda Matildani chiqarib olishga uringan, ammo keyinroq qutqaruvchilarni yordamga chaqirishga majbur bo‘lgan. Mutaxassislar chig‘irdan foydalanib, 500 kilogrammni toshni siljitishga va ayolni tor teshik orqali chiqarib olishga muvaffaq bo‘lgan.

Piter Uots ismli qutqaruvchining so‘zlariga ko‘ra, mazkur voqea uning 10 yillik faoliyatidagi eng murakkab vazifalardan biriga aylangan.

Matildaga jiddiy jarohat yetmagan — uning ba’zi joylari ko‘kargan va shilingan, ammo telefonni topishning imkoni bo‘lmagan.

Kempbell ijtimoiy tarmoqlardagi sahifasiga ushbu holat bo‘yicha post qoldirdi: «Ishonch bilan aytish mumkinki, men — baxtsiz hodisalarga ko‘p uchraydigan insonman. Ahvolim yaxshi, faqat biroz jarohat oldim va hozirda o‘zimni qayta tiklamoqdaman. Endi ma’lum bir vaqt hech qanaqa tog‘ga chiqish yo‘q!» Shuningdek, ayol do‘stlari va qutqaruvchilar jamoasiga minnatdorchilik bildirgan.