Andijon viloyatidagi korxonalarning birida yong‘in sodir bo‘lgan. Viloyat Favqulodda vaziyatlar boshqarmasining xabar berishicha, hodisa bugun 2024 yil 3 oktyabr kuni ertalab sodir bo‘lgan.
Ma’lum qilinishicha, Andijon viloyat FVBga soat 09:44 da Xo‘jaobod tumani «Yangihayot» MFY hududida joylashgan "Simona billur" MChJga tegishli korxonaning ishchilar oshxonasida yong‘in sodir bo‘layotgani haqida xabar kelib tushgan.
Soat 10:00 da aytilgan manzilga o‘t o‘chiruvchilar yetib borgan va soat 10:15 da yong‘in batamom o‘chirilgan.
Yong‘in oqibatida, MChJ binosining 50 metr kvadrat maydonda shift qismi yonib zararlangan.
Qayd etilishicha, hodisada hech kim tan jarohati olmagan va halok bo‘lmagan. Hozirda yong‘inning kelib chiqish sabablari va moddiy zarar miqdori aniqlanmoqda.
