AQSh Mudofaa vazirligi yangi Warhead 93/Mark7 yadroviy jangovar kallaklari o‘rnatilgan Trident II D5 qit’alararo ballistik raketalariga buyurtma berdi. Qiymati 2,1 milliard dollarni tashkil etuvchi shartnoma Lockheed Martin mudofaa sanoati korporatsiyasi bilan imzolandi. Uning ijrosi 2029 yil 30 sentabrga qadar ta’minlanishi kerak va ushbu qurollar Buyuk Britaniyaga ham yetkazilishi kutilmoqda, deb xabar beradi Pentagon matbuot xizmati.
Shu bilan birga, idora Lockheed Martin’ga Trident II raketa uskunalari tizimini va suvosti kemalari uchun navigatsiya uzellarini yaratish uchun 1,16 milliard yevro ajratdi. Ushbu buyurtmalarning amalga oshirish muddati — 2031 yil 29 sentabr.
Bundan tashqari, Pentagon Boeing kompaniyasi bilan Ukraina, Bolgariya va Yaponiya uchun mo‘ljallangan kichik kalibrli bombalarni ishlab chiqarish bo‘yicha 6,9 milliard yevrolik shartnoma tuzdi. Kompaniya buyurtmani 2035 yil 31 dekabrga qadar bajarishi kerak.
Trident II D5 — uch pog‘onali qit’alararo ballistik raketa bo‘lib, atom suvosti kemasidan uchiriladi. Bundan snaryadlar AQSh Harbiy-dengiz kuchlari va Buyuk Britaniya floti qurollanishida mavjud. Trident II D5ʼning maksimal parvoz uzoqligi 11,3 ming kilometrni tashkil etadi.
Joriy yilning aprelida AQSh so‘nggi 40 yil ichida ilk bor yangi W93 yadroviy jangovar kallaklarni ishlab chiqarishni boshlashi ma’lum bo‘lgandi. Uni yaratish ustidagi ishlar 2022 yilning mayidan beri davom etmoqda va yadroviy sinovlarni o‘tkazish ko‘zda tutilmagan.
Yadroviy xavfsizlik bo‘yicha milliy agentlik (NNSA) 2023 yilda Pentagonga 200 dan ortiq modernizatsiya qilingan yadroviy o‘q-dorilarni topshirgan edi. Tashkilot rahbari Jill Xrubining so‘zlariga ko‘ra, mazkur yetkazib berish sovuq urush tugaganidan beri eng yirik buyurtma bo‘lgan.
