Niderlandiyaning sobiq bosh vaziri Mark Ryutte NATO bosh kotibi lavozimiga rasman kirishdi. U bu lavozimda 2014 yildan beri ishlab kelgan Yyens Stoltenbergni almashtirdi.

1 oktyabr kuni bo‘lib o‘tgan marosimda NATO harbiy alyansi rahbari lavozimiga kirishgan Mark Ryutte Ukrainani qo‘llab-quvvatlashni ustuvor vazifa qilib qo‘yishga va’da berdi, deb yozdi Euronews.

Ryutte alyans Ukrainani qo‘llab-quvvatlashni kuchaytirishi va uni NATO a’zoligiga yanada yaqinlashtirishi kerakligini ta’kidlagan bo‘lsa, mudofaa shartnomasiga a’zo davlatlar rahbarlari Kiyevning a’zolik yo‘lini ortga qaytarib bo‘lmasligini aytishdi.

Ryuttening aytishicha, ittifoq endi har qachongidan ham katta, kuchli va birlashgan. Uning so‘zlariga ko‘ra, NATO bosh kotibi sifatidagi ustuvor vazifalari, shuningdek, NATO mudofaasini mustahkamlash va boshqa davlatlar bilan hamkorlikni mustahkamlash bo‘ladi.

Mark Ryutte 2010 yil oktyabridan beri Niderlandiya bosh vaziri lavozimida ishlab kelgan, u Rossiyani tanqid qilgan va Rossiya Federatsiyasi bilan urushda Ukrainani doimiy ravishda qo‘llab-quvvatlagan.