Niderlandiya o‘z flotini to‘rtta suvosti kemasi bilan to‘ldiradi

Niderlandiya Fransiyaning Naval Group kompaniyasi bilan to‘rtta suvosti kemasini yetkazib berish bo‘yicha 5,6 milliard yevrolik shartnoma imzoladi, deb xabar beradi Le Figaro.

Naval Group suvosti kemalarini yetkazib berish bo‘yicha tenderni o‘tgan yilning martida yutgan edi. Buyurtma qilingan submarinalar 2039 yilgacha Fransiyaning Barracuda atom suvosti kemalari bazasida yaratiladi. Ular qirollik floti tarkibiga 1990 yilda kiritilgan dizel-elektrda harakatlanuvchi Walrus’ning o‘rnini egallashi kutilmoqda.

Hamkorlik to‘g‘risidagi bitim doirasida kamida 10 ta Niderlandiya kompaniyasi va ikkita ilmiy-tadqiqot instituti yangi submarinalar uchun zarur bo‘lgan ehtiyot qismlar va texnologiyalarni yaratishga to‘g‘ridan-to‘g‘ri jalb etiladi.

Tenderda, shuningdek, Shvetsiyaning Saab va Germaniyaning TKMS kompaniyalari ishtirok etgandi. Germaniya kompaniyasi shartnomani qo‘lga kirita olmagani uchun sudga ham murojaat qilgan. Naval Group bilan bitim Niderlandiya Mudofaa vazirligi Moddiy ta’minot boshqarmasi bilan muhokama qilingan va parlament tomonidan ma’qullangan. Natijada, shartnomani imzolashga olti oy vaqt ketgan.

Qirollik uchun mo‘ljallangan suvosti kemalari kompaniyaning Sherbur shahridagi zavodida yig‘iladi, ammo qator muhim tizimlari va texnik xizmat ko‘rsatishlariga Niderlandiya javob beradi. Naval Group bir necha o‘n yillardan beri Niderlandiya harbiy-dengiz sanoati bilan hamkorlik qilib keladi. O‘tgan yilning kuzida Niderlandiya Walrus sinfiga kiruvchi eski suvosti kemalarini foydalanishdan chiqarishni boshlagan edi. Orka nomini olgan dastlabki ikkita submarina 2034 yildan 2037 yilga qadar yetkazib beriladi. Ular Amerikaning Mark 48 torpedalari va qanotli raketalarini tashiy oladi.