Xitoyda eng yangi atom suvosti kemasi may oyining oxiri — iyun oyi boshida cho‘kib ketdi. Bu Vuxan shahri yaqinidagi kemasozlik zavodida sodir bo‘ldi, deb xabar bermoqda The Wall Street Journal (WSJ) va Reuters 26 sentabr, payshanba kuni manbalarga tayanib. Xitoy rasmiylari buni yashirishga harakat qilgan.
WSJ va Reuters ma’lumotlariga ko‘ra, Zhou sinfidagi suvosti kemasi cho‘kib ketdi — bu o‘z turidagi birinchi suvosti kemasi. U Wuachang kemasozlik zavodida China State Shipbuilding Corp. kompaniyasi tomonidan qurilgan. Suvosti kemasi oxirgi marta may oyining oxirida Yanszi daryosida payqalgan, u yerda dengizga chiqishdan oldin jihozlanayotgan edi. Iyun oyi boshida suvosti kemasini daryo tubidan ko‘tarish uchun kranlar cho‘kish joyiga yetib kelgan, bundan Planet Labs sun’iy yo‘ldosh suratlari darak beradi.
Maxfiylik pardasi ostida
Cho‘kish vaqtida suvosti kemasida yadro yonilg‘isi bo‘lgan yoki bo‘lmagani noma’lum, ammo bu ehtimoldan yiroq emas, deydi WSJ manbalari. Favqulodda vaziyatdan keyin suv namunalari olingani haqida hech qanday belgilar yo‘q. Shuningdek, hodisa natijasida qurbonlar va jarohatlanganlar to‘g‘risida ma’lumot taqdim etilmagan.
«Xitoy Xalq-ozodlik armiyasi harbiy-dengiz kuchlari o‘zining yangi sinfdagi yadroviy hujumkor suvosti kemasi cho‘kib ketganini yashirishga urinayotgani ajablanarli emas. Mashg‘ulotlar standartlari va jihozlar sifatiga oid aniq savollardan tashqari, bu voqea Xitoy Xalq-ozodlik armiyasining ichki javobgarligi va uzoq vaqtdan beri korrupsiyadan aziyat chekkan Xitoy mudofaa sanoati ustidan nazorat haqida chuqurroq savollar tug‘diradi», dedi AQSh Mudofaa vazirligidagi manba WSJ'ga bergan intervyusida.
