Pistorius: Germaniya RFni Yevropada tiyib turish ustuniga aylanishga tayyor

Germaniya mudofaa vaziri Boris Pistorius Germaniya qurolli kuchlari Rossiyaning Yevropadagi tajovuzkorligini oldini olishning asosiy ustuniga aylanishga tayyorligini bildirdi. «Biz Yevropadagi markaziy logistika markazi sifatida o‘z mas’uliyatimizni tushunamiz, agar kerak bo‘lsa, qo‘shinlar Atlantikadan sharqiy qanotga tezlik bilan harakatlanishini ta’minlaymiz», dedi Pistorius 26 sentabr, payshanba kuni Vilnyusda Litva parlamentidagi chiqishida.

U Germaniyaning NATO qurolli kuchlariga qo‘shgan hissasini quyidagicha ta’rifladi: «2025 yilga borib 35 mingdan ortiq nemis askari, 200 ta samolyot, ikkita fregat va qo‘shimcha kuchlar tezkor shay holatga keltirilishi mumkin». U Germaniyaning 2027 yilgacha Litvada to‘laqonli brigadani joylashtirish rejalarini tasdiqladi va bu yil bu mamlakatga harbiy xizmatchilarni yuborishni boshlashini ta’kidladi.

«Rossiya uchun Ukraina - faqat boshlanishi»

Boris Pistorius o‘z nutqida Ukraina Rossiya uchun faqat boshlanish ekanligiga ishonch bildirdi. «Rossiya bizning birdamligimizni, Yevropa Ittifoqi va NATOni gibrid usullar bilan buzishga harakat qilmoqda, Putinning haqiqiy dushmani - bizning erkin va mustaqil, demokratik hayot tarzimiz», dedi u.

Vazir 2014 yilda Qrimdagi voqealardan so‘ng, «bu chaqiruvga javob berish o‘rniga «trevoga signalini kechiktirish» tugmasi bosilganidan» shikoyat qildi.

DW muxbiri Putinning Rossiya yadroviy kuchlaridan foydalanishning yangi qoidalari haqidagi so‘zlarini izohlashni so‘raganida, Pistorius shunday javob berdi: Bu - Vladimir Putin to‘plamining bir qismi. Biz o‘z rolimizni tahdidli xabarlarni tarqatuvchi sifatida ko‘rmaymiz. Bunga izoh berishning hojati yo‘q, ertaga yana bir bayonot beriladi. Biz o‘z yo‘limizdan boramiz, vaziyat nazorat ostida ekanligini ko‘rsatish uchun o‘zimiz to‘g‘ri deb hisoblagan narsani qilamiz.

Bir kun avval Putin Rossiya yadroviy tiyib turish bo‘yicha doktrinani o‘zgartirgani va o‘z hududiga yadro zarbasini kutmasdan, yadro qurolidan foydalanishga tayyorligini ma’lum qilgandi.