Samarqandda qiz va ayollarni O‘mon davlatiga fohishalikka jo‘natish bilan shug‘ullanib kelgan ikki ayolga sud hukmi o‘qildi. Bu haqda viloyat IIB axborot xizmati xabar bermoqda.

Ma’lum qilinishicha, asli Farg‘onadan bo‘lgan 32 yoshli ayol yosh qizlarni O‘mon davlatida fohishalikka majburlab kelgan. U o‘zining jinoiy qilmishiga jizzaxlik ayolni sherik qilgan.

Bu ikki ayol chet elga chiqish orzusida yurgan qizlarni viza va boshqa xarajatlarini to‘lab, ularni 2021 yildan boshlab xorijga yuborgan. Qizlarning orasida farg‘onalik ayolning ovsini ham bo‘lgan.

“Zamon” informatsion dasturida berilgan lavhada ayol uy olish va sharoitini yaxshilash uchun ishlash maqsadida borganini, biroq manzilga yetgach o‘z ovsini uni fohishalikka majburlaganini aytgan.

"Men borganimda umuman til bilmasdim, tushunmasdim. U gaplashib, qizlarni mehmonxonaga tashlab chiqardi. Men ofitsiantlikka borgan edim, keyin meni fohishalikka majburladi",- deydi ayol.

Guvohlardan biri sudlanuvchi u yerga juda ko‘p qizlarni chaqirib bergani, 18 ta qiz bor, deb eshitganini ta’kidlagan. Shuningdek, jabrlanuvchilar ikki ayol ularni kuch ishlatib jazolaganini ham aytishgan.

Holat yuzasidan sud ishi Samarqand shahar sudida ko‘rib chiqildi. Bu haqda "Zamon" dasturi xabar qildi.

Jinoyat ishlari bo‘yicha Samarqand shahar sudida o‘tkazilgan sud majlisida sudlanuvchilar Jinoyat kodeksining 135-moddasi 2-qismining tegishli bandlarida nazarda tutilgan jinoyatni sodir etganlikda aybdor deb topilgan.

Har ikki ayolga nisbatan 5 yil 1 oy muddatga ozodlikdan mahrum qilish jazosi tayinlangan.