Qayd etilishicha, kamida to‘qqizta alanga o‘chog‘ini nazoratga olishning imkoni bo‘lmayapti. O‘t o‘chiruvchilarning ishiga issiq havo va kuchli shamol xalaqit bermoqda.

Mamlakat hukumatining ma’lum qilishicha, favqulodda xatar zonasida 100 dan ortiq munitsipalitet, jumladan, aholisi gavjum bo‘lgan hududlar ham joylashgan. 15 sentabr kuni mamlakatda favqulodda holat e’lon qilindi — u kamida chorshanba kuniga qadar amalda bo‘ladi.

Eng og‘ir vaziyat Portugaliya shimolida joylashgan Aveyru shahrida kuzatilmoqda, u yerda bir nafar o‘t o‘chiruvchi halok bo‘lgan, ko‘plab uylar yonib ketgan.

Yevropa Ittifoqi fuqarolik mudofaasi mexanizmi Portugaliyaga zudlik bilan o‘t o‘chirish texnikalari, jumladan, boshqa davlatlardan aviatsiya yordamini olishni ta’minlaydi. Hozirda Ispaniya va Fransiya o‘zlarining o‘t o‘chiruvchi samolyotlarini yuborgan. Yevropa Ittifoqi Lissabonga yangi alanga o‘choqlarini kuzatishda yordam beradigan real vaqt rejimidagi sun’iy yo‘ldosh ma’lumotlarini taqdim etadi.

BBC’ning yozishicha, Portugaliyada 1,5 mingga yaqin o‘t o‘chiruvchi o‘rmon yong‘inlariga qarshi kurashga jalb etilgan. «Vaziyat nazorat ostidan chiqib ketmadi, ammo juda murakkab. Bugun og‘ir kun bo‘ladi, ertaga ham», — deydi milliy fuqarolik mudofaasi qo‘mondoni Andre Fernandes.