Britaniya Ukrainaga Rossiya hududiga hujum uchun Storm Shadow qanotli raketalaridan foydalanishga ruxsat berishga qaror qildi, deb xabar berdi The Guardian gazetasi 11 sentabr, chorshanba kuni kechqurun Britaniya hukumatidagi manbalariga tayanib. Bu haqda nashr AQSh davlat kotibi Entoni Blinken va Britaniya tashqi ishlar vaziri Devid Lemmining 11 sentabr kuni Kiyevga qo‘shma tashrifiga bag‘ishlangan maqolasida aytib o‘tgan. Safar chog‘ida ular Ukraina prezidenti Volodimir Zelenskiy bilan uchrashib, G‘arb uzoq masofaga mo‘ljallangan qurollarining Rossiya hududiga zarbalarini muhokama qilishgan.
Gazeta manbalarining ta’kidlashicha, Blinken va Lemmi Kiyevga Storm Shadow bo‘yicha ijobiy qaror qabul qilingani uchun birga kelgan. Shu bilan birga, The Guardian qayd etishicha, agar Lemmi qarorni Kiyevda e’lon qilganida edi, uning so‘zlari keraksiz provokatsiya sifatida qabul qilinishi mumkin edi.
Nashrning qo‘shimcha qilishicha, Ukrainaning raketalardan foydalanishi «keraksiz hujumlar oldini olish uchun» cheklovlarga duchor bo‘lishi mumkin. Blinken Kiyevga tashrifi chog‘ida Qo‘shma Shtatlar birinchi kundanoq Ukrainadagi jang maydonidagi vaziyat o‘zgarganligi sababli o‘z siyosatini moslashtirishga tayyor bo‘lganini aytdi. «Biz buni davom ettiramiz», dedi u.
Raketalardan foydalanish bo‘yicha ehtimoliy cheklovlar
Blinken Kiyevning urushda qanday maqsadlari borligi va ularga erishish uchun Vashington nima qilishi mumkinligini Zelenskiy va boshqa ukrainalik rasmiylardan bevosita eshitishni istayotganini aytdi, deb yozadi Reuters.
Uchrashuvdan so‘ng Zelenskiy Blinken va Lemmi bilan «juda mazmunli va uzoq suhbat» o‘tkazganini aytdi. «Barcha asosiy masalalar muhokama qilindi, bu Ukrainaning argumentlarini eshitish, uzoq masofali qurollar, frontda jangovar brigadalar bilan ta’minlash va adolatli tinchlikni yaqinlashtirish bo‘yicha umumiy strategiyaga taalluqlidir», — dedi Zelenskiy.
Qaror ochiq e’lon qilinmaydi
Ukraina prezidenti bilan uchrashuvdan so‘ng Blinken Kiyevning AQSh prezidenti Jo Baydenga, Lemmi esa Britaniya bosh vaziri Kir Starmerga pozitsiyasini bayon etishga va’da berdi. 13 sentabr kuni Vashingtonda AQSh va Britaniya rahbarlari uchrashadi. The Guardian nashrining yozishicha, ushbu uchrashuv natijasida ular London Ukrainaga Rossiyaga zarba yo‘llash uchun Storm Shadow’dan foydalanishga ruxsat berganini ochiq e’lon qilmasliklari kutilmoqda.
Ukraina qurolli kuchlari Qrimga zarba berish uchun ATACMS va Storm Shadow’dan foydalangan. Zelenskiy bir necha oy davomida G‘arb davlatlaridan Ukrainaga Rossiya hududiga hujum qilish uchun Amerikaning ATACMS va Britaniyaning Storm Shadow raketalaridan foydalanishiga ruxsat berishni so‘ramoqda. Shu paytgacha AQSh mojaro kuchayib ketishidan xavotirlanib, bunday zarbalarga qarshi bo‘lib kelgan.
