Hongkongda «Yagi» supertayfuni tufayli 101 ta reys bekor qilindi. Bu haqda havo bandargohi elektron tablosi ma’lumotlariga tayanib, mahalliy OAV xabar bermoqda.

«Mahalliy vaqt bilan soat 18:20 da Hongkong meteorologiya observatoriyasi «Yagi» supertayfuni yaqinlashayotgani tufayli joriy yilda bo‘rondan ogohlantirish darajasini birinchi marta T8 darajasiga qadar ko‘tardi. Shu bois shahardagi yerusti jamoat trasnportlari deyarli to‘liq faoliyatini to‘xtatdi. O‘quv muassasalaridagi darslar bekor qilindi», — deb yozadi South China Morning Post.

Qayd etilishicha, shahardagi do‘konlar oziq-ovqat zaxiralarini g‘amlab olishga chiqqan aholi va turistlarga to‘lib ketgan. Hongkong hukumati, shuningdek, fuqarolarni baland hududlar va qirg‘oq bo‘ylarini tark etishga, zarurat bo‘lmasa, uylarini tark etmaslikka chaqirmoqda.

Meteorologlarning baholashicha, tayfun shahardan 330 kilometr janubda bo‘lib, hozirda shimoli-g‘arb yo‘nalishida harakatlanmoqda. 6 sentabr kunining ikkinchi yarmida u Xaynan provinsiyasining janubiy qismi va Leychjou yarimoroliga yopirilishi kutilmoqda. Ayni vaqtda supertayfun ichidagi shamol tezligi soniyasiga 58 metrni tashkil etmoqda.

Eslatib o‘tamiz, avgust oxirlarida Yaponiyada «Shanshan» tayfuni yaqinlashayotgani tufayli 230 dan ortiq reys bekor qilingandi. Bekor qilingan aviareyslarning aksariyati Japan Airlines kompaniyasiga tegishli (28 avgust kungi 82 ta reys va ertasi kuni yana 60 ta reys) edi.