O‘zbekiston Madaniy boyliklarni asrash va tiklash xalqaro tadqiqot markazi (IKKROM)ning 138-a’zo davlati bo‘ldi. Bu haqda “Gazeta.uz” xabar bermoqda.

“O‘zbekistonda YuNESKOning Jahon merosi ro‘yxatiga kiritilgan bir qancha obektlar, jumladan, temuriylar davrining ajoyib obidalari bilan mashhur bo‘lgan Buxoro va Shahrisabz tarixiy markazlari, Xiva ichki qismidagi Ichan-qal’aning noyob shahar majmualari va tarixiy Samarqand shahri joylashgan. Transmilliy jahon merosi obektlari bo‘lgan Zarafshon-Qoraqum Ipak yo‘li yo‘lagi va Turon mo‘’tadil cho‘llari O‘zbekistonning qadimiy savdo yo‘llaridagi strategik rolidan dalolat beradi hamda Markaziy Osiyo tabiiy landshaftining xilma-xilligi va mustahkamligini namoyish etadi. O‘zbekistonning an’anaviy bilimlari, hunarmandchiligi va turmush tarzi bilan ifodalangan nomoddiy merosi ham uning bebaho tarixiy hissasini ko‘rsatadi”, — deyiladi nashr e’lon qilgan xabarda.

IKKROM bosh direktori Aruna Francheska Mariya Gujralning aytishicha, O‘zbekistonning ming yilliklarni qamrab olgan moddiy va nomoddiy boy hamda rang-barang merosi mamlakatning xalqaro miqyosda e’tirof etilgan tarixiy va madaniy ahamiyatidan dalolatdir.

“IKKROMga qo‘shilish O‘zbekistonga boy bilim va tajribani olib kirish imkonini beradi, bu, shubhasiz, madaniy merosni asrab-avaylashni qo‘llab-quvvatlash bo‘yicha o‘z zimmamizga yuklangan vazifani bajarish bo‘yicha jamoaviy sa’y-harakatlarimizni boyitadi”, — degan u.

IKKROM — madaniy merosni asrashga bag‘ishlangan hukumatlararo tashkilot. IKKROM faoliyati merosni asrash usullari sifatini oshirishga, shuningdek, madaniy merosni asrab-avaylash muhimligi haqida xabardorlikni oshirishga qaratilgan. IKKROM beshta asosiy yo‘nalishda ishlaydi: o‘qitish, axborot, tadqiqot, hamkorlik va targ‘ibot.