Parij Paralimpiadasida para taekvondo bahslarida O‘zbekiston navbatdagi medallarini qo‘lga kiritdi. 

-80 kg vazn toifasida dayanga chiqqan Asad Toshtemirov finalda meksikalik Luis Mario Najyerani 38:17 hisobida mag‘lubiyatga uchratib, jahon chempionligi yoniga Paralimpiada g‘olibligini ham qo‘shib qo‘ydi. 

+65 kg vazn toifasida dayanga chiqqan, Tokio-2020 chempioni Guljanoy Naimova esa finalda britaniyalik Emi Trusdeylga qarshi bahsda jarohat olib, jangni oxirigacha davom ettirolmadi va 2:8 hisobida yutqazib, bu safar kumush medalga sazovor bo‘ldi.

Natijada O‘zbekiston delegatsiyasi hisobidagi medallar soni 10 taga yetdi — 4 oltin, 3 kumush, 3 bronza.