Yevropa top-ligalarida 30 avgust kuni yozgi transferlar oynasi yopiladi. Klublar so‘nggi transferlar ustida ishlamoqda. So‘nggi daqiqalarda ham katta transferlar amalga oshirilishi mumkin. Quyida muxlislar va mutaxassislar dedlayn arafasida kutayotgan 10 ta ehtimoliy transfer haqida.
Manuel Ugarte: «PSJ» → «Manchester Yunayted»
Yoshi: 23
Transfer qiymati: 45 million yevro
Shartnomasi muddati: 2028 yil 30 iyun
«Manchester Yunayted» tayanch zonasini kuchaytirishi lozim. Erik ten Hag ixtiyorida yosh Kobbi Maynu va tajribali Kazemiro bor. Ammo braziliyalik futbolchi «Real»dagi formasiga qayta olmayapti. Yarimhimoya chizig‘ida esa turli-tumanlik zarur. «MYu»ga Manuel Ugarte yordamga kelishi kutilmoqda. Urugvaylik futbolchi «PSJ»ning muhim futbolchisiga aylana olmadi: Luis Enrike ushbu tayanch yarimhimoyachisi muhim paslarni amalga oshirishni talab qildi, bu esa Ugartening kuchli tarafi emas. U raqib hujumlarini buzishda benazir. «MYu» urugvaylik futbolchi transferi uchun 60 mln yevro to‘lamoqchi. Barcha uchun ma’qul kelishuv.
Jyeydon Sancho: «Manchester Yunayted» → «Yuventus»/«Chelsi»/«Borussiya»
Yoshi: 24
Transfer qiymati: 30 million yevro
Shartnomasi muddati: 2026 yil 30 iyun
Jyeydon Sancho Erik ten Hag bilan yarashdi. Ammo bu unga klubda qolishga yordam bermayapti. U mavsumoldi yig‘inlari doirasidagi o‘rtoqlik uchrashuvlarida maydonga tushdi, ammo APLning yangi mavsumi startida «Fulhem» (1:0) va «Brayton» (1:2) bilan kechgan o‘yinlarda qaydnomaga ham kiritilmadi.
Sancho navbatdagi klubga ijaraga berilishi kutilmoqda: qishda u Dortmundning «Borussiya» klubiga qaytgandi, endi esa Italiyaga safar qilishga yaqin. «Yuventus»ga hujum qanotida yangi futbolchilar kerak. Turinliklar «Fiorentina»dan Nikolas Gonsalesni transfer qildi va «Portu»dan Fransishku Konseysauni ijaraga oldi. Sancho bu kompaniyani to‘ldirishi mumkin. Lekin futbolchining o‘zi APLda qolishni va «Chelsi»ga o‘tishni istamoqda. Ammo londonliklar Sanchoni ijaraga olish bo‘yicha harakatga kirishgani yo‘q. Shuningdek, «Borussiya» varianti ham bor, nemislar klubi futbolchini ijaraga olmasdan, 35 million yevro evaziga qayta sotib olishi mumkin.
Rahim Sterling: «Chelsi» → «Arsenal»/«MYu»
Yoshi: 29
Transfer qiymati: 35 million yevro
Shartnomasi muddati: 2027 yil 30 iyun
Sterling — londonliklarning tushunarsiz transfer siyosatining navbatdagi qurboni. Mavsumoldi yig‘inlari chog‘ida Enso Mareska uni jamoaning muhim futbolchilaridan biri deb atadi, mavsum starti arafasida esa asosiy tarkibdan chiqarib yubordi.
Bu qaror futbolchining atrofidagilarga yoqmadi va uning ketishi haqida xabarlar chiqa boshladi. Avvaliga Sancho London klubiga kelishi evaziga Sterling «MYu»ga o‘tishi haqida aytilayotgandi. Bir kun oldin esa ijtimoiy tarmoqlarda Rahim «Arsenal» bazasida tushgan surat tarqaldi, ayrim manbalar futbolchi va Mikel Arteta muloqot qilgani haqida xabarlar paydo bo‘ldi. Oxirgi xabarlarga ko‘ra, klublar futbolchining ijarasi bo‘yicha muzokaralar olib bormoqda. «Chelsi» futbolchining maoshining bir qismini to‘lab berishga ham tayyor.
Viktor Osimhen: «Napoli» → «Chelsi»/«PSJ»/«Al-Ahli»
Yoshi: 25
Transfer qiymati: 100 million yevro
Shartnomasi muddati: 2026 yil 30 iyun
Nigeriyalik hujumchi Chempionlar ligasida o‘ynamoqchi. Qolaversa, Antonio Konte kelishi ham «Napoli»ning holatini u qadar yaxshilay olmayapti. Viktor anchadan buyon kattaroq klubga o‘tishga harakat qilib keladi, lekin Yevropada uning uchun so‘raladigan pulni to‘lashga tayyor klublar ko‘p emas. Futbolchiga turli vaqtlarda «Chelsi», «MYu» va «PSJ» klublari qiziqishdi, ularning barchasida markaziy hujumchi muammosi bor. Parijliklarning moliyaviy imkoniyati nisbatan yaxshiroq, ammo jamoa ko‘pi bilan 50-60 million yevro taklif qilgan, neapolitanliklar esa bundan ikki barobar ko‘proq so‘ragan. Bundan tashqari, forvard maoshi kamayishiga ham rozi emas, shuningdek, shartnomada badal puli to‘g‘risidagi band kiritilishini talab qiladi.
Transferlar oynasi yakuniga kelib neapolitanliklar ancha kamroq summaga ham rozi bo‘lib qoldi va Saudiyaning «Al-Ahli» klubi o‘rtaga chiqdi: Fabritsio Romano xabar berishicha, klublar transfer bo‘yicha kelishuvga erishishga yaqin. «Al-Ahli» hozircha Osimhenning o‘zi bilan kelishib olmagan. «PSJ» endi futbolchiga qiziqmay qo‘ygan, «Chelsi»da esa muqobil variantlar bor. Shunday ekan, Osimhen katta ehtimol bilan Saudiya Arabistoniga yo‘l oladi.
Temmi Abraham: «Roma» → «Milan»/Aleksis Salemakers «Milan» → «Roma» (almashuv)
Yoshi: 26
Transfer qiymati: 30 million yevro
Shartnomasi muddati: 2026 yil 30 iyun
Transferlar oynasining so‘nggi kunida «Milan» va «Roma» o‘z futbolchilarini almashmoqda. Yarimhimoyachi Aleksis Salemakers Italiya poytaxtiga yo‘l oladi, Temmi Abraham qarama-qarshi yo‘nalishda harakatlanadi. Morata jarohat olganidan keyin «Milan»ga forvard zarur bo‘lib qoldi, «Roma»ga vinger kerak. Jurnalist Matteo Moretto xabariga ko‘ra, klublar kelishuv tuzilmasida ayrim detallani hal qilib olishi qolgan.
Jonatan Ta: «Bayyer» → «Barselona»
Yoshi: 28
Transfer qiymati: 30 million yevro
Shartnomasi muddati: 2025 yil 30 iyun
«Barselona» bosh murabbiyi Hans-Diter Flik kutilmaganda Germaniyadan futbolchi olib kelishni xohlab qoldi. Jurnalist Jyerar Romero xabariga ko‘ra, nemis mutaxassis rahbariyatdan «Bayyer» himoyachisi Jonatan Tani olib kelishni so‘ragan. «Barsa»ga birinchi navbatda tayanch yarimhimoyachisi kerak, ammo Flik boshqa zonada kattaroq muammo ko‘rmoqda. Jurnalist Rodjyer Torelloning qayd etishicha, «Barsa» «Bayyer»ga Ta uchun 20 mln yevro taklif qilgan. Jonatan ham Ispaniyaga ko‘chib o‘tishni va Flik qo‘li ostida o‘ynashni istamoqda. «Bayyer» esa bu futbolchisi uchun 30 mln yevro talab qiladi, ammo «Barsa» leverkuzenliklar «Bavariya»ni kuchaytirmaslik uchun uni Kataloniyaga qo‘yib yuborishiga ishonmoqda, myunxenliklar ham Ta uchun 20 mln yevro taklif qilgan.
Ayvan Toni: «Brentford» → «Chelsi»/«Al-Ahli»
Yoshi: 28
Transfer qiymati: 50 million yevro
Shartnomasi muddati: 2025 yil 30 iyun
Ayvan Toni o‘tgan mavsumda o‘yinlar natijalariga pul tikish mojarosi tufayli sakkiz oylik diskvalifikatsiyani o‘tadi. Ammo forvardga «Brentford» qiziqish yo‘qolib qolgani yo‘q. Ko‘plab transferlarga qaramay, hali markaziy hujumchi olmagan «Chelsi» Tonini hujum chizig‘i uchun variant sifatida qaramoqda. The Telegraph ma’lumotiga ko‘ra, «Brentford» Ayvan transferi uchun 60 mln yevro so‘ragan. «Chelsi» buncha mablag‘ to‘lashga rozi emas, ammo muzokaralar to‘xtamagan. Lukakuni «Napoli»ga pullagan londonliklarda Viktor Osimhen varianti ham bor. Ammo «Brentford» ehtimoliy transfer tufayli Tonini tarkibdan chiqargan. Bu vaqtda unga ham «Al-Ahli»dan taklif bor, saudiyaliklar Osimhenni tarkibga qo‘shib ololmasa, unga asosiy e’tiborni qaratadi.
Kingsli Koman: «Bavariya» → «Barselona»/«PSJ»/«Manchester Siti»/«Al-Hilol»
Yoshi: 28
Transfer qiymati: 50 million yevro
Shartnomasi muddati: 2027 yil 30 iyun
Kingsli Koman «Bavariya»ning yangi bosh murabbiyi Vensan Kompaniga kerak emas. Shu tufayli myunxenliklar fransuz vingeri bo‘yicha takliflarga ochiq. Yevropa nashrlari «Barselona», «PSJ», «Arsenal» va «Manchester Siti» klublaridan qiziqishlar haqida yozdi. Ammo ayni vaqtda real taklif faqat saudiyaliklarning «Al-Hilol» klubidan bo‘lgan, shayxlar uning uchun 40 mln yevro to‘lashga tayyor. L'Équipe yozishicha, Koman Yaqin Sharq taklifini qabul qilishdan oldin Yevropadagi transferlar oynasi yopilishigacha kutishi mumkin. Kingsli faqat Yevropaning top-klublaridan taklif tushmasa, «Al-Hilol»ga o‘tishga rozi bo‘ladi.
Adriyen Rabio: «Yuventus» → «Milan»
Yoshi: 29
Transfer qiymati: 35 million yevro
Erkin agent
Bu ro‘yxatdagi klubsiz yagona futbolchi. «Yuventus»dagi besh yildan keyin fransuz yarimhimoyachisi shartnomasini uzaytirmadi. Turinliklar unga bir mavsum uchun 7 million yevro taklif etishgandi, ammo u shartnomaga imzo chekmadi.
Yozda unga qator top-klublardan qiziqishlar mavjudligi haqida xabarlar tarqaldi. L'Yequipe «Bavariya», «Inter» va «Atletiko» kabi klublarning vakillari Adriyen bilan aloqaga chiqqani haqida yozdi, ammo tomonlar shartnoma bo‘yicha kelisha olmagan. Rabio yiliga 7,5 million yevro so‘ramoqda va APLda o‘ynashni afzal ko‘rmoqda. So‘nggi xabarlarga ko‘ra, «Milan» klubi unga asosiy da’vogarga aylangan.
Jovani Lo Chelso: «Tottenhem» → «Betis»
Yoshi: 28
Transfer qiymati: 16 million yevro
Shartnomasi muddati: 2025 yil 30 iyun
Fabritsio Romano xabariga ko‘ra, Qatarning «Al-Jazira» klubi «Betis»dan Nabil Fekirni sotib olmoqchi. Ispanlar esa fransuz futbolchi o‘rniga Jovani Lo Chelsoni olib kelmoqchi. Argentinalik futbolchi «Tottenhem» bosh murabbiyi Angelos Posteko‘g‘lining rejalaridan o‘rin olmagan, «Betis»dagilar esa 2024 yilgi Amerika kubogi g‘olibini yaxshi bilishadi. U 2018/2019 va 2019/2020 yillar mavsumida ushbu klubda o‘ynagan. Transfermarkt Lo Chelsoning transfer qiymatini 16 mln yevroga baholagan. «Betis» uni ijaraga olishni istamoqda.
