Polsha o‘zining MiG-29 ko‘p maqsadli qiruvchi samolyotlarini ularni almashtirish uchun yangi jangovar samolyotlar olgandan keyingina Ukrainaga o‘tkazishi mumkin bo‘ladi. Bu haqda Polsha mudofaa vaziri Vladislav Kosinyak-Kamish ma’lum qildi, deb yozadi Wiadomości nashri 27 avgust, seshanba kuni.
Kosinyak-Kamish Polsha rasmiylari Ukrainaga harbiy yordam ko‘rsatishga «bir necha milliard dollar» hissa qo‘shganini, bu borada qo‘lidan kelganini qilganini eslatdi. Biroq, u Polshaning o‘z mudofaa qobiliyatini saqlab qolishni asosiy ustuvor vazifa deb atadi. «Ukrainalik hamkorlarimiz buni tushunishlari kerak», dedi Polsha mudofaa vazirligi rahbari.
Uning so‘zlariga ko‘ra, hozirda Polsha harbiy-havo kuchlarida foydalanishda bo‘lgan MiG-29 samolyotlarini Ukrainaga o‘tkazish to‘g‘risidagi qaror mamlakat yangi jangovar samolyotlarni olgandan keyingina qabul qilinishi mumkin. Gap, xususan, Varshava Qo‘shma Shtatlarga buyurtma bergan F-35 qiruvchi samolyotlari haqida ketmoqda - ular 2026 yildan keyin yetkazib beriladi. Ungacha Polshaning mavjud MiG’lari o‘z havo hududini himoya qilish uchun kerak bo‘ladi, deya ta’kidladi Kosinyak-Kamish.
Zelenskiy Polshadan MiG-29’ni so‘ragandi
27 avgust kuni Ukraina prezidenti Volodimir Zelenskiy sovet rusumidagi qiruvchilarni Ukraina qurolli kuchlariga o‘tkazish uchun Polshaning roziligini olmoqchi ekanligini aytdi. «Bizga MiG juda kerak», dedi Ukraina rahbari.
Zelenskiy, shuningdek, Polsha Ukrainaga yirik havo hujumlari paytida Rossiya raketalari va uchuvchisiz uchoqlarini urib tushirish orqali g‘arbiy mintaqalari osmonini himoya qilishda yordam berishni taklif qildi. Rossiya qurolli kuchlari tomonidan 26 avgustga o‘tar kechasi va o‘sha kuni ertalab mamlakatning 15 ta hududiga yuzdan ortiq raketa va yuzga yaqin hujumkor uchuvchisiz uchoqlar uchirilgan so‘nggi shunday ommaviy zarba berildi. Oqibatda o‘nlab infratuzilma obektlari shikastlangan, qurbonlar va jarohatlanganlar bor. Ushbu hujum paytida Polsha o‘z harbiy-havo kuchlarini havoga ko‘tardi.
Avgust oyi boshida Ukraina g‘arb hamkorlaridan Amerikaning birinchi 10 ta F-16 qiruvchi samolyotini olgani ma’lum bo‘ldi. 27 avgust kuni Rossiya Federatsiyasi tomonidan amalga oshirilgan yirik havo hujumidan so‘ng, Zelenskiy Ukraina qurolli kuchlari ushbu qiruvchilarni Rossiyaga qarshi ishlatishga tayyorlanayotganini aytdi.
