Bosh prokuratura matbuot xizmatining ma’lum qilishicha, 24 avgust kuni bo‘lib o‘tgan majlisda komissiya va ishchi guruh a’zolari – Oliy sud, ichki ishlar, tashqi ishlar vazirliklari, Yoshlar ishlar agentligi, mahalla uyushmasi, Din ishlari bo‘yicha qo‘mita, Musulmonlar idorasi rahbar xodimlari, DXX va Bosh prokuraturaning tegishli boshqarma boshliqlari hamda boshqa mas’ul xodimlari qatnashgan.

Yig‘ilishda «Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan O‘zbekiston Respublikasi fuqarolarini jinoiy javobgarlikdan ozod etish tartibini takomillashtirish to‘g‘risida»gi prezident farmoni ijrosi yuzasidan taqiqlangan tashkilotlar tarkibiga adashib kirib qolgan fuqarolarning jinoiy javobgarlikdan ozod etish haqida taqdim etilgan murojaatlar ko‘rib chiqildi.

Ma’lum qilinishicha, komissiya yig‘ilishda 10 ta murojaat o‘rganib chiqilib, komissiyaning muhokamasiga taqdim etilgan.

«Komissiya tomonidan har bir murojaat batafsil ko‘rib chiqilib, natijasi bo‘yicha tegishli qarorlar qabul qilinishi ta’minlandi», — deyiladi xabarda.

Bosh prokuror matbuot kotibi Hayot Shamsutdinovning Kun.uz’ga ma’lum qilishicha, fuqarolar murojaatining 7 tasi qanoatlantirilgan. 3 fuqaroni javobgarlikdan ozod etish rad qilindi.