Safar davomida O‘zbekiston delegatsiyasi a’zolari Ispaniyaning El Corte Inglés, Tendam, Gedepsa va ACIR Southern Europe kompaniyalari vakillari bilan uchrashuvlar o‘tkazishdi. Bo‘lib o‘tgan muloqotlar chog‘ida ispan tomoni O‘zbekiston to‘qimachilik sanoatida amalga oshirilayotgan keng ko‘lamli islohotlar, mahalliy ishlab chiqaruvchilarning eksport salohiyati bilan tanishtirildi.

Gedepsa kompaniyasi bosh direktori Alexandro Pastrana bilan kechgan uchrashuvda o‘zbek mahsulotlarini Ispaniya bozoriga eksportini kengaytirish masalalari muhokama qilindi. Muzokaralar natijasida Madridda O‘zbekiston to‘qimachilik mahsulotlari namoyish etiladigan savdo uyini tashkil etish, shuningdek, Ispaniya bozorida mamlakatda ishlab chiqarilgan to‘qimachilik mahsulotlarini ommalashtirish bo‘yicha loyihalarni ishlab chiqish to‘g‘risida kelishuvga erishildi.

Xalqaro maslahatchi Albert Ernandes bilan bo‘lib o‘tgan muzokaralar chog‘ida O‘zbekiston mahsulotlarini Ispaniya bozorlariga kiritish strategiyalari, logistika va tarqatish masalalari xususida fikr almashildi. "Ispan moda kompaniyalari bilan aloqalarni yo‘lga qo‘yish va o‘zbekistonlik ishlab chiqaruvchilarning Ispaniya tenderlarida ishtirok etishini qo‘llab-quvvatlash bo‘yicha zarur yordam ko‘rsatishga tayyorman", – dedi u.

O‘zbekiston delegatsiyasi a’zolarining El Corte Inglés va Tendam kompaniyalari global xaridlar departamenti vakillari bilan muzokaralari chog‘ida esa o‘zbek to‘qimachilik mahsulotlarini har ikki kompaniyaning chakana savdo tarmoqlariga joylashtirish imkoniyatlari ko‘rib chiqildi.