Navoiyda Yangi Navoiy shaharchasi qurilishiga tamal toshi qo‘yildi. Navoiy viloyati hokimi Normat Tursunov, sektor rahbarlari, nuroniylar, keng jamoatchilik vakillari ishtirokida o‘tkazilgan tadbirda shaharcha loyihasi taqdimoti o‘tkazilgan. Bu haqda Kun.uz’ga viloyat hokimligi matbuot xizmati rahbari Shohira Raufboyeva ma’lum qildi.

Loyiha Karmana tumanidan Navoiy shahriga o‘tkazilgan hudud – Yoshlik mahallasida amalga oshirilmoqda. Shaharchaning umumiy maydoni 1097,6 gektarni tashkil etib, birinchi bosqichda 450 gektar yer maydonida qurilish ishlari bajarilishi rejalashtirilgan.

Loyiha Navoiy viloyati hokimligi huzurida amalga oshiriladi. Buning uchun “Yangi Navoiy shaharchasi” ishbilarmonlik markazi direksiyasi” davlat muassasasi tashkil etilgan. 

Shaharchada “Yangi O‘zbekiston” bog‘i va madaniy dam olish sayilgohlari, Navoiy davlat pedagogika institutining yangi binolari (kampus tipida) va boshqa ijtimoiy soha obektlari, ko‘p qavatli turarjoylar, tadbirkorlik va ishbilarmonlik, maishiy xizmat ko‘rsatish va servis obektlari bo‘ladi. Shuningdek, hududda kutubxona, sun’iy ko‘l va hunarmandchilik ustaxonalari bunyod etiladi.

Qurilish ishlari Xitoy, Turkiya va mahalliy qurilish kompaniyalari tomonidan amalga oshirilmoqda. Hozir e-auksion.uz platformasi orqali 20 ga yaqin lotlar xaridi e’lon qilingan.