Birlashgan Millatlar Tashkiloti bosh kotibi Antoniu Guterrishning aytishicha, Isroil o‘z hujumlarini kuchaytirishda davom etayotgan G‘azo janubida falastinliklar azoblanishini «dunyo kuzatib o‘tiribdi». 

Guterrish BMTning Nyu-Yorkdagi qarorgohida bergan matbuot bayonotida: «G‘azodagi falastinliklar uchun bundan ham yomoni nima bo‘lishi mumkinligi haqida o‘ylab o‘tirar ekanmiz, janubdagi azob-uqubatlar kuchayib bormoqda va dunyo buni kuzatib o‘tiribdi», dedi. 

Bosh kotib G‘azo gumanitar nuqtayi nazardan «erkin qulash»ni boshdan kechirayotganini ta’kidladi. Uning so‘zlariga ko‘ra, so‘nggi haftalarda mintaqadagi oqova suvlarda poliomiyelit virusi aniqlangan. Bu endi virus G‘azoda xavf ostida bo‘lgan yuz minglab bolalarda aniqlanishi mumkinligini anglatadi. 

«Birlashgan Millatlar Tashkiloti G‘azodagi 340 000 dan ortiq bolalar uchun poliomiyelitga qarshi emlash kampaniyasini boshlashga tayyorlanmoqda», dedi bosh kotib. 

Siyosatchi, shuningdek, G‘azoda suv ta’minoti va sanitariya tizimlari qulashi, aksariyat shifoxonalar xizmat ko‘rsata olmasligi va xavfsizlik muammolari tufayli odamlarning «doimiy qochqinligi» kabi muammolarni tilga oldi. 

«Mojaro rejali emlashni jiddiy ravishda buzdi. Bu qizamiq va gepatit A kabi boshqa oldini olish mumkin bo‘lgan kasalliklarning tarqalishini kuchaytirdi», — dedi BMT rahbari. 

«Men barcha tomonlardan kampaniya uchun gumanitar tanaffuslar bo‘yicha zudlik bilan aniq kafolatlar berishlarini so‘rayman. Poliomiyelitga qarshi eng samarali vaksina tinchlik va zudlik bilan gumanitar sulhni ta’minlashdir. Urush bor ekan, poliomiyelitga qarshi emlash kampaniyasini amalga oshirish mumkin emas. Poliomiyelit siyosatdan ustun bo‘lishi kerak, u barcha bo‘linishlardan muhimroqdir. Nafaqat G‘azodagi falastinlik bolalar, balki qo‘shni davlatlar va butun mintaqa uchun halokatli oqibatlarga olib keladigan yovuzlikni yengish bizning umumiy burchimizdir», — dedi Antoniu Guterrish.