Ukraina Qurolli kuchlari Bosh shtabi Rossiyaning Belgorod, Kursk va Bryansk oblastlari bilan chegaradosh Sumi oblastida fuqarolarning harakatlanishini vaqtincha chekladi. Cheklovlar Rossiya Federatsiyasi bilan chegaradagi 20 kilometrlik zonada joriy qilingan va «barcha toifadagi fuqarolarga» tegishli», deya ma’lum qildi 13 avgust, seshanba kuni Ukraina Bosh shtabi.
Qaror harbiy qo‘mondonlik tomonidan «harbiy harakatlar jadalligi oshishi, qo‘poruvchilik va razvedka guruhlari, dushman maxsus operatsiya kuchlari faollashgani hamda tinch aholi va harbiy xizmatchilarning hayotini saqlab qolish maqsadida qabul qilingan».
Faqat mahalliy aholi yopiq zonaga kirishi mumkin, ular «ushbu zonada yashash joyini ro‘yxatdan o‘tkazishning tegishli belgisi bo‘lgan Ukraina fuqarolarining pasportlaridan foydalanishi lozim».
Ukrainaning Kursk oblastidagi hujumi
Ukraina Qurolli kuchlari 6 avgust kuni Rossiyaning Kursk oblastiga hujum boshladi. Ukraina Qurolli kuchlari bosh qo‘mondoni Aleksandr Sirskiy 12 avgust kuni Ukraina armiyasi qariyb 1000 kvadrat kilometr Rossiya hududini nazorat qilayotganini aytdi. Janglar Korenev va Sudja rayonlari hamda Belovskiy rayonida davom etmoqda. U yerda Rossiya Federatsiyasidan tabiiy gaz Ukrainaning gaz transport tizimiga boradigan va keyin Yevropa Ittifoqiga tranzitga ketadigan yagona nuqta - «Sudja GIS» bor. Bundan tashqari, mintaqada Kursk atom elektr stansiyasi joylashgan.
Ukraina prezidenti Volodimir Zelenskiy ilk bor 10 avgust kuni Ukraina Qurolli kuchlarining Rossiya hududiga hujumi haqida ochiqchasiga izoh berib, UQK bosh qo‘mondoni unga «urushning tajovuzkor hududiga o‘tkazilgani haqida» ma’lum qilganini aytdi. Bunday harakatlar Kiyevning «adolatni tiklash» va Rossiyaga kerakli bosim o‘tkazish qobiliyatini isbotlaydi, dedi u.
Ayni vaqtda, Kursk oblasti gubernatori vazifasini bajaruvchi Aleksey Smirnov 12 avgust kuni Rossiya prezidenti Vladimir Putin bilan uchrashuvda Ukraina Qurolli kuchlari oblastidagi 28 ta aholi punktini nazoratga olganini tan oldi. OAV hisob-kitoblariga ko‘ra, bu ko‘rsatkich yanada yuqori bo‘lishi mumkin.
