Rossiyaning Ukraina Sumi oblasti energetika infratuzilmasiga raketa va havo hujumi natijasida bir kishi jarohat oldi. Bundan tashqari, elektr tarmog‘i, gaz quvuri, shifoxona binosi va bir qancha avtomobillarga zarar yetgan. Bu haqda Sumi oblasti harbiy ma’muriyati 13 avgust, seshanba kuni ertalab ma’lum qildi.

«Barcha kerakli xizmatlar voqea joyida ishlamoqda», — deyiladi xabarda. Ukrainaning Liga.net internet-nashri yozishicha, Rossiya zarbasi natijasida Sumi aholisi bir qismi elektr va gaz ta’minotisiz qolgan.

Nashr eslatishicha, 8 avgust kuni Rossiya Sumi oblastining aholi punktlariga 46 marta zarba bergan. Ikki kishi halok bo‘ldi, yana olti kishi yaralandi. Bundan tashqari, bir qator fuqarolik infratuzilmasi obektlari zarar ko‘rgan. 

Rossiya Ukrainaga «Iskander-M» raketalari bilan zarba berdi 

Ukraina Qurolli kuchlari Havo kuchlari matbuot xizmati 13 avgustga o‘tar kechasi Rossiya Qurolli kuchlari Voronej viloyatidan ikkita «Iskander-M/KN-23» ballistik raketalari va Primorsko-Axtarsk hamda Kursk oblastlaridan Shahed tipidagi 38 ta hujumkor dron bilan Ukrainadagi nishonlarga hujum qilgani haqida xabar berdi.

«Havo hujumidan mudofaa jangi natijasida Ukraina mudofaa kuchlarining mobil o‘t ochish guruhlari, aviatsiya, zenit-raketa bo‘linmalari va REK texnikasi Mikolayiv, Vinnitsa, Sumi, Kirovoxrad, Xerson, Chernixiv, Dnipropetrovsk va Cherkassk oblastlarida 30 ta dushman uchuvchisiz uchoqlarini urib tushirdi», — deyiladi Ukraina Qurolli kuchlari xabarida.

12 avgust kuni Ukraina prezidenti Volodimir Zelenskiy o‘z vatandoshlariga kundalik murojaatida Ukraina Qurolli kuchlari bosh qo‘mondoni Aleksandr Sirskiyning Kursk oblastidagi operatsiya haqidagi ma’ruzasi mazmuni haqida gapirdi. Hujjatda, xususan, Ukraina Qurolli kuchlari Kursk oblastida operatsiya boshlagani, chunki bular «Rossiya armiyasi Sumi oblastiga hujum qilgan hududlar» ekani aytiladi.