Bekobodda 5-qavatdan tushib ketib vafot etgan ayolning turmush o‘rtog‘i uzoq muddatga ozodlikdan mahrum qilindi. Kun.uz sud hujjati bilan tanishdi.
Hukmda keltirilishicha, 1989 yilda tug‘ilgan D.X. o‘ziga moddiy hamda boshqa jihatlardan qaram bo‘lgan turmush o‘rtog‘i N.X.ni sababsiz turli bahonalar bilan urib, azoblab kelgan. 2022 yil 15 dekabr kuni tazyiq va zo‘ravonlikka uchragan ayolga IIB tomonidan himoya orderi berilgan. Biroq D.X. bundan xulosa chiqarmagan va ayolning sha’ni va qadr-qimmatini kamsitishda davom etgan. 2024 yil 6 mart kuni N.X.ga yana himoya orderi berilgan. Erkak esa qilmishi uchun 10 sutka ma’muriy qamoq jazosini o‘tab chiqqan.
Ammo D.X. yana janjal chiqargan. 2024 yilning 27 mart kuni N.X. turmush o‘rtog‘ining qilmishlaridan charchab, ijara asosida yashab kelgan Bekobod tumani, Dalvarzin mahallasidagi ko‘p qavatli uyning 5-qavatdan o‘zini tashlagan va vafot etgan.
D.X. sudda aybiga iqrorlik bildirmagan. U turmush o‘rtog‘iga g‘amxo‘rlik qilib kelishini, uning sha’ni va qadr-qimmatini muttasil ravishda kamsitib kelmaganligini ta’kidlagan.
“O‘sha kuni turmush o‘rtog‘im bilan janjallashganim yo‘q. Negadir uning kayfiyati bo‘lmadi, oshxonaga kirib, ichkaridan eshikni qulflab oldi. Xavotirlanib eshik derazasini sindirgancha ichkariga kirdim. U hayotdan to‘yib ketganligini takror-takror aytdi va derazadan o‘zini tashlamoqchi bo‘ldi. Shu paytda uning soch qismidan qattiq ushlab oldim va farzandlari borligini, bunday qilmasligini aytdim. Ammo u o‘lgim kelyapti deb pastga tushib ketdi”, degan D.X.
Erkakning qilmishi guvohlarning ko‘rsatmalari, hodisa joyini ko‘zdan kechirish bayonnomalari, sud tibbiy ekspertiza xulosalari bilan to‘liq o‘z isbotini topgan.
Sud D.X.ni Jinoyat kodeksining 103-moddasi 2-qismi “a” bandida nazarda tutilgan jinoyatni (moddiy tomondan yoki boshqa jihatlardan aybdorga qaram bo‘lgan shaxsni o‘zini o‘zi o‘ldirish darajasiga yetkazish) sodir etganlikda aybli deb topgan. Unga 9 yil ozodlikdan mahrum qilish jazosi tayinlangan.
D.X. bundan avval ham sudlangan. U 2013 yilda Jinoyat kodeksining 110-moddasi 2-qismi “a” bandi (voyaga yetmagan shaxsni qiynash), 136-moddasi (Ayolni erga tegishga majbur qilish yoki uning erga tegishiga to‘sqinlik qilish), 166-moddasi 3-qismi “a” bandi (Talonchilik) bilan aybdor deb topilib, 5 yilu 6 oy muddatga ozodlikdan mahrum qilingan, amnistiya munosabati bilan jazoning uchdan bir qismi (bir yarim yil)ni o‘tab chiqqan.
