Namangan viloyati Pop tumanidagi 43-maktab direktori pedagoglarni ta’lim maskaniga chaqirib, muassasa hududini tozalashga, o‘t-o‘lan, beda va ajriqlarni yulishga majbur qilgani aytilmoqda. Bu haqda Qalampir.uz nashri xabar bergan.

Qayd etilishicha, tahririyatga berilgan materiallarga ko‘ra, maktab direktori M.Marasulova o‘qituvchilarning vazifasidan tashqari ishlarni qilishni istamaganlardan 500 ming so‘mdan pul talab qilgan. Qolaversa, ularni o‘quvchilarning ota-onalaridan pul yig‘ishga ham majburlagani ta’kidlangan.

Holat yuzasidan Kambag‘allikni qisqartirish va bandlik vazirligi rasmiy munosabat bildirdi. Unga ko‘ra, vaziyatni vazirlikning Pop tumani bo‘limi Davlat mehnat inspeksiyasi o‘rgangan.

Shunga muvofiq Mehnat kodeksining 5-moddasi hamda hukumatning 349-sonli qaroriga zid ravishda, muassasa xodimlari maktab hovlisida tozalov ishlariga jalb etilgani aniqlangan.

Tashkilot rahbariga nisbatan Ma’muriy javobgarlik to‘g‘risidagi kodeksning 51-moddasi 1-qismiga asosan BHMning 50 baravari, 17 million so‘m miqdorida ma’muriy jarima qo‘llangan.

Eslatib o‘tamiz, “Pedagogning maqomi to‘g‘risida”gi qonunga ko‘ra, ularni kasbiy faoliyati bilan bog‘liq bo‘lmagan ishlarga, shu jumladan hududlarni obodonlashtirishga va qishloq xo‘jaligi ishlariga jalb qilish taqiqlanadi.