Belgorod, Bryansk va Kursk viloyatlarida aksilterror operatsiyasi (ATO) rejimi joriy etildi. Bu haqda 9 avgust, juma kuni Rossiya Federatsiyasi Milliy aksilterror qo‘mitasi (MAQ) ma’lum qildi.
Bu haqda Rossiya Federal xavfsizlik xizmati direktori Aleksandr Bortnikov qaror qabul qildi. Ukraina Qurolli kuchlari (UQK) Kursk viloyati bilan chegarani yorib o‘tganidan so‘ng, gap «vaziyatni beqarorlashtirishga misli ko‘rilmagan urinish» haqida ketyapti, deb tan oldi MAQ.
Kursk viloyati gubernatori vazifasini bajaruvchi Aleksey Smirnovning so‘zlariga ko‘ra, rasmiylar keyingi «sabotaj va terrorchilik tahdidlari»dan xavotirda.
Aholining huquq va erkinliklarini jiddiy cheklash
Rejimning parametrlari «Terrorizmga qarshi kurashish to‘g‘risida» gi federal qonun bilan belgilanadi.
Shunday qilib, u jismoniy shaxslarning hujjatlarini tekshirish va hujjatlar yo‘q bo‘lgan taqdirda ularni ichki ishlar organlariga yuborishni o‘z ichiga oladi. Aholiga ma’lum hududlar va obektlarga kirish taqiqlanishi mumkin. Rasmiylar elektron yozishmalarni o‘qish va telefon suhbatlarini tinglash huquqiga ega.
Ushbu chora fuqarolarni «vaqtinchalik ko‘chirish»ni, shuningdek, transport vositalari va piyodalar harakatini cheklashni nazarda tutadi. Xavfsizlik xizmatiga uy-joy va yer uchastkalariga to‘siqsiz kirish huquqi beriladi.
Rejim harbiy texnikadan foydalanishni o‘z ichiga oladi
ATO uchun harbiylar, Milliy gvardiya, fuqarolik mudofaasi va federal idoralardan iborat maxsus kuchlar guruhi yaratilishi mumkin. Rossiyada uni kim boshqarishi mumkinligi hozircha aniqlashtirilmadi. Rejim harbiy texnika, qurol va maxsus texnikadan foydalanishga rasman ruxsat beradi.
Urushni o‘rganish bo‘yicha Amerika institutining 8 avgust kuni xabar berishicha, Ukraina Qurolli kuchlari Ukrainaning Sumi viloyati bilan chegarasidan Rossiya hududiga 35 kilometr chuqurlikda ilgarilab ketgan.
Ayni vaqtda, Qodirovning «Axmat» ko‘ngilli maxsus bo‘linmasi qo‘mondoni Apti Alaudinov avvalroq uning bo‘linmalari hamon Rossiya-Ukraina chegarasida qolayotganini ta’kidlagan edi.
Federal favqulodda holat
Rossiya Federatsiyasi Favqulodda vaziyatlar vazirligi «Kursk viloyatidagi vaziyatni» federal favqulodda holat deb tan oldi. «Mintaqada federal darajadagi choralar o‘rnatildi», deya xabar berdi vazirlik 9 avgust kuni.
Ayni paytda, Rossiya Mudofaa vazirligiga yaqin bo‘lgan "Rybar" Telegram-kanali Ukraina qurolli kuchlari Sudjaning g‘arbiy chekka hududlarini nazorat ostida ushlab turganini ma’lum qildi.
Rossiyaning Venadagi doimiy vakolatxonasida aytilishicha, Rossiya Atom energiyasi bo‘yicha xalqaro agentlikni Kursk atom elektr stansiyasidagi vaziyat haqida xabardor qilgan. Missiya ma’lumotlariga ko‘ra, 8 avgust kuni stansiyada, shu jumladan, radioaktiv chiqindilarni qayta ishlash majmuasi hududida urib tushirilgan raketalarning bo‘laklari topilgan.
Material e’lon qilingan paytda boshqa manbalardan bu ma’lumot tasdiqlanmagan.
2023 yil may oyida Belgorod viloyatida Ukraina tomonida jang qilayotgan Rossiya ko‘ngillilar korpusi va «Rossiya erkinligi legioni» jangchilarining Ukraina hududidan kirib kelishi munosabati bilan qisqa muddatga ATO rejimi joriy etilgandi.
