Qo‘shma Shtatlar Rossiya va Germaniya fuqarosi Artur Petrovni eksport nazoratini buzish, kontrabanda, pul o‘tkazmalari va pul yuvish bilan bog‘liq jinoyatlar uchun Kipr Respublikasidan ekstraditsiya qilinganidan keyin dastlabki sudga chaqirdi. Bu haqda AQSh Adliya vazirligining 9 avgust, juma kuni chop etilgan press-relizida aytiladi.
«Petrov va uning sheriklari eksport nazoratini buzgan holda sotib olgan texnologiyalar muhim harbiy qo‘llanmaga ega bo‘lib, Ukrainadagi jang maydonida Rossiya harbiy texnikasidan topilgan turli elektron komponentlarni o‘z ichiga oladi. Ular raketalar, dronlar va radioelektron kurash hamda aloqa qurilmalarida aniqlandi», — deyiladi vazirlik matbuot xizmatida.
Rossiyalik sakkizta band bo‘yicha ayblanadi, ularning har biri 5 yildan 20 yilgacha qamoq jazosini nazarda tutadi. «Federal okrug sudi sudyasi hukmni AQShning jazo tayinlash bo‘yicha ko‘rsatmalari va boshqa qonuniy jihatlarni ko‘rib chiqqandan so‘ng belgilaydi», - deya aniqlik kiritadi AQSh Adliya vazirligi.
Petrov deyarli bir yil oldin hibsga olingan
Rossiya va Germaniya fuqarosi bo‘lgan 33 yoshli Artur Petrov 26 avgust kuni Kiprda AQSh talabiga binoan hibsga olindi. Petrov Rossiyaga AQShda ishlab chiqarilgan, raketalar va dronlar, elektron urush tizimlari va aloqa vositalarida qo‘llanadigan mikroelektronika kontrabandasida ayblandi. Bunday mahsulotlarni Rossiyaga yetkazib berish AQSh qonunchiligi bilan taqiqlangan.
AQSh Adliya vazirligi ma’lumotlariga ko‘ra, Petrov ikki sherigi (ismlari noma’lum rossiyaliklar) bilan birga 2022 yil fevralidan 2023 yil avgustigacha Rossiyaning harbiy-sanoat korxonalariga mahsulot yetkazib beradigan «Elektrokom VPK» MChJ uchun Amerika firmalaridan katta miqdorda elektronika sotib olgan. Kontrabandachilar yetkazib berish Rossiyaga mo‘ljallanganini yashirish uchun uchinchi mamlakatlarda ro‘yxatdan o‘tgan soxta yuridik shaxslardan foydalangan.
Rossiyaga sanksiyalarni chetlab o‘tgan holda mahsulot yetkazib berish
2022 yil dekabr oyida Nyu-York Sharqiy okrugi federal okrug sudi besh nafar Rossiya fuqarosi va ikki AQSh fuqarosini sanksiyalarni chetlab o‘tish maqsadida Rossiya mudofaa sanoati uchun elektronika kontrabandasini tashkil qilishda aybladi. Amerika tomoni «FSB» zobiti deb hisoblagan rossiyalik Vadim Konoshchenok ikki marta Estoniya-Rossiya chegarasida Amerikada ishlab chiqarilgan elektron butlovchi qismlar va patronlar bilan to‘xtatilgan.
