Rossiyada YouTube videoxostingi ochilmayapti. 8 avgust, payshanba kuni ko‘plab viloyatlar aholisi portal bilan bog‘liq muammolar haqida xabar berishdi - u ham kompyuterlarda, ham mobil qurilmalar orqali ochilmayapti.
YouTube ishidagi nosozliklar Rossiyaning turli monitoring xizmatlari, xususan, «Sboy.rf» sayti tomonidan tasdiqlangan. Uning ma’lumotlariga ko‘ra, eng ko‘p shikoyatlar Moskva (21 foiz) va Sankt-Peterburg (8 foiz) aholisidan keldi. Ular ertalab soat 8 dan boshlab yozila boshlandi va soni ortib bormoqda.
Foydalanuvchilarning shikoyatlari bo‘yicha avvalgi eng yuqori cho‘qqi 1 avgustda kuzatilgan, o‘shanda YouTube ishida oxirgi keng ko‘lamli uzilish sodir bo‘lgandi. Foydalanuvchilar saytga kirishda ham, videolarni ko‘rishda ham muammolar borligi haqida xabar berishdi. Downdetector portalidagi ma’lumotlar ham YouTube’ga kirishda uzilishlar borligini ko‘rsatdi.
«Rostelekom» va Duma deputatining YouTube’dagi uzilishlar haqida ogohlantirishi
Iyul oyi o‘rtalarida «Rostelekom» operator tarmoq infratuzilmasida foydalaniladigan Google uskunasi ishlashidagi texnik nosozliklar tufayli Rossiyadagi foydalanuvchilar uchun YouTube'dagi ehtimoliy uzilishlar haqida ogohlantirgan edi. «Rostelekom» aytib o‘tgan Google Global Cache tizimi og‘ir ma’lumotlarni yuklashni tezlashtirishga imkon beradi. ComNews Research ixtisoslashgan nashri ma’lumotlariga ko‘ra, 2022 yil boshida Rossiya Federatsiyasida faoliyat ko‘rsatayotgan 700 ta shunday serverdan 2023 yil oxiriga kelib atigi 450 tasi qolgan. Bozor ishtirokchilari uskunaning tabiiy eskirishi haqida ogohlantirgan.
Rossiya Davlat dumasi deputati Aleksandr Xinshteyn 25 iyul kuni Rossiya rasmiylari yaqin kunlarda YouTube ishini sekinlashtira boshlashini aytdi. Parlament a’zosining so‘zlariga ko‘ra, avgust oyi boshiga borib, xizmatni ish stoli kompyuterlariga yuklab olish tezligi 70 foizga tushadi. Biroq, sekinlashuv hali saytning mobil versiyasiga ta’sir qilmaydi, deb ishontirdi Xinshteyn. Deputat bu chorani Rossiya rasmiylarining «majburiy qadami» deb atadi. U YouTube'ni Rossiya qonunchiligini mensimaslikda aybladi va servis vakillarini videoxosting siyosatini o‘zgartirishga chaqirdi.
Iyul oyi boshida YouTube Yevropa Ittifoqining Rossiyaga qarshi sanksiyalari 14-paketiga kiritilgan qo‘shiqchilar Yaroslav Dronov (Shaman) va Polina Gagarinaning rasmiy kanallarini bloklab qo‘ydi. Oleg Gazmanov, Yuliya Chicherina, Grigoriy Leps va mehmonlari Rossiyaning Ukrainaga hujumini ommaviy ravishda qo‘llab-quvvatlovchi «Empatiya Manuchi» shousi muallifi, aktyor Vyacheslav Manucharovning kanallari ham bloklandi.
