Yozgi Olimpiya o‘yinlarida O‘zbekiston delegatsiyasi boks bo‘yicha dastlabki medalini qo‘lga kiritdi. 

-51 kg vaznda Hasanboy Do‘smatov finalda fransiyalik Bilol Bennamaga qarshi ringga ko‘tarilib, 5:0 hisobida g‘alaba qozondi va ikki karra Olimpiada chempioniga aylandi.

Do‘smatov turnirdagi ishtirokini nimchorakfinalda Puerto-Riko vakili Hesus Huanma Lopesga qarshi jangda g‘alaba qozonish bilan boshlagandi (5:0), keyin chorakfinalda qozog‘istonlik Saken Bibossinovga qarshi o‘ta og‘ir jang o‘tkazdi (3:2), yarimfinalda esa Kabo-Verde vakili David de Pina to‘sig‘idan o‘tdi (5:0).

Ushbu bokschi Rio-2016 olimpiadasida ham tengsiz bo‘lgandi. 

Boks bo‘yicha o‘smirlar Olimpiadasi g‘olibi, jahon chempioni Abdumalik Xalokov ham Olimpiya o‘yinlarining finaliga yo‘llanma oldi. -57 kg vazn toifasida ishtirok etayotgan sportchi yarimfinalda avstraliyalik Charli Seniorni mag‘lubiyatga uchratdi (5:0).

Endi u 10 avgust kuni chempionlik uchun ringga ko‘tariladi. Uning oltin yo‘lidagi so‘nggi raqibi o‘zbekistonlik murabbiy Akmal Hasanov yordamida ishtirok etayotgan qirg‘izistonlik Munarbek Seyitbek uulu bo‘ladi.

Shu tariqa, yarimfinalgacha yetib kelgan o‘zbekistonlik 5 nafar bokschining barchasi hal qiluvchi bosqichga yo‘l olishdi.

Avvalroq taekvondo bo‘yicha Ulug‘bek Rashitov ham ikki karra Olimpiya o‘yinlari g‘olibligini qo‘lga kiritib, bu borada birinchi o‘zbekistonlikka aylangandi.

Kun avvalida 45-o‘rinda turgan O‘zbekiston delegatsiyasi Parij-2024dagi medallarini 5 taga (3 ta oltin, 2 ta bronza) yetkazib, umumjamoa hisobida 18-pog‘onaga ko‘tarildi.